La Gaita

De tolos instrumentos musicales que formen l'ampliu campu de la música popular, la gaita ye ún de los más embruxiladores, tantu pola apariencia externa y el soníu gayoleru comu pola función social que tien .

La so nacencia piérdese na nueche los tiempos. Aunque la mayoría de los investigadores y musicólogos coinciden n'atribuyí-y una antigüedá anterior a la era cristiana y un orixen mesopotámicu, hitita o sumeriu, lo único que paez que ta claro ye que llegaría a Roma a través de les conquistes n'Oriente y que seríen los propios romanos los que la difundiríen per tol Imperiu.
Cuesta faer una clasificacién de les gaites, yá que habeles hailes casi per tol mundu. Amás de n'Europa , existen diferentes tipos n'Asia, en Norteafrica y Arabia, pero, ensin duda, d'esta estensa familia, les más conocíes son les de tipu europeu-occidental (asturiana, gallega, escocesa, etc..)

Esti tipu de gaita componse d'un depósitu d'aire, dos o más tubos sonoros, según tengan dos o tres roncones, y un tubu auxiliar (soplete o portavientu) pa introducir l'aire nel fuelle.
Lleven además unes lengüetes,dobles nel punteru y cencielles nos roncones (les payueles y payones), que son les que realmente producen el soníu y son l'alma la gaita.
Toes estes gaites son bastante parecíes ente elles y aunque la más evolucionada seya la escocesa nos últimos años tamíen los artesanos asturianos, gallegos y bretones consiguen, calteniendo la tradición, unes gaites cada vegada de meyor calidá.

La gaita asturiana experimentó nestos últimos años una gran evolución pasando de ser una de les más primitives a ocupar un llugar destácau nel mundu cola invención de la gaita ellétrica.
Teniendo'n cuenta'l tonu, les gaites asturianes dividense 'n tres tipos diferentes: grillera, redonda y tumbal. La grillera ye la más aguda y chillona de les tres y aunque anguañu yera la más usada, agora limitase'l so usu al acompañamientu de los grupos de danza o en pareyes aislaes de gaita y tambor.

La redonda ye la más utilizada n'actualidá. Tien un soníu más anchu y agradable que la grillera y úsase pa acompañar la tonada o canción asturiana, pa tocar nos grupos folk y pop y ye tamién la más utilizada nes bandes de gaites y tambores. La tumbal tien una sonoridá más profunda y grave y ye más adecuada pa acompañar les voces graves na cancién y nes mises de gaita. Usáse tamién nes bandes de gaites y nos grupos folk.

Hay diferentes escueles de gaiteros, coles sos diferentes técniques, estilos y formes d'espresión. Si tuvieramos que citar algunos gaiteros famosos tendríamos qu'aniciar pol de Llibardón, Ramón Garcia Tuero, que tocaba y cantaba al mismu tiempu y que fizo xires por Europa e Hispanoamerica. Y al par, Xosé Remis Vega , el Gaiteru de Margolles, creador del estilu Remis, difundíu dempués pol so fíu Xosé Remis Ovalle, que fue Gaiteru Mayor d'Asturies y d'España y fizo tamién xires por Europa y América.

Aparte de ser l'estrumentu más representativu de la música popular asturiana, la gaita ye imprescindible na inmensa mayoría des actividaes que se desarrollen na rexén. Además de les típiques parexes de gaiteros y tamboriteros que amenicen les romeríes, la gaita forma parte del repertoriu de los grupos de danza y bailes tradicionales y xuega un papel perimportante na tonada asturiana. Otra de les facetes tradicionales de la gaita ye el so emplegu comu estrumentu relixosu pal acompañamientu de mises, procesiones y demas liturxes.

Dende mediaos los años 70, nos que los grupos del Nuevu Canciu Astur incorporen la gaita nes sos grabaciones discográfiques y nes actuaciones en direutu, la llínea seguida ye ascendente e imparable, tando presente na actualidá n'orquestes, grupos de folk, rock, pop, etc y muy especialmente a traviés de les bandes de gaites, numberoses formaciones de gaiteros y gaiteres cada vegada más estendides y demandades pa tou tipu d'actos festivos o institucionales.

El fenómenu Hevia, que nun se puede llamar d'otra manera, cabezaleru nes llistes d'esitos y convertíu'n en Númberu Unu mundial, vistió esti vieyu instrumentu cola tecnoloxía del sieglu XXI, abriendo puertes a los artistes asturianos del nuevu mileniu. Y tóo esto , a pesar de que la enseñanza n'Asturies ye muy precaria y mayormente autodidacta.

El gran númberu de xente , sobre tóu xoven, que ta deprendiendu , l'altu nivel de los enseñantes y la calidá alcanzada na fabricacién tan pidiendo a gritos la puesta'n marcha duna Escuela d'Estrumentos Populares y Folclore, comu hai ya notres Comunidaes Autónomes.

Pilar Sánchez Vicente