L'osu Pardu

Los montes cantábricos son unos de los más espectaculares d'Europa, nun solo polos paisaxes, el clima o los ríos, tamién por tar paralelos a la costa, cerca la mar y nun ser demasiáu altos (la cota más alta son 2.700 metros). L'osu pardu ta seriamente amenazáu pol home y tá'n grave pelligru d'estinción, arrequexáu nos paraxes más aislaos y xabaces desta cordillera.

A principios desti sieglu, esistíen nes montañes del Norte d'España munchos osos pardos. Guei, queden a la rodiada de 80. L'osu pardu ye un animal de cara simpática, oreyes y gueyos pequeños y un pocu cegatu, lo que compensa col oídu y col olfatu. Ye noctámbulu, muevese ente l'atapecer y la alborada y camina sobre les plantes de los pies y de les manes, polo que ye un plantígradu, comu l'home. El color del pelu varía entel marrón y el prietu y vuelvense canosos cola edá, tamién comu los paisanos. L'osu pardu ye de los más pequeños. El so pesu puede variar ente los 60 y los160 Kg. La altura varía ente 1,70 y 2,20 y pueden vivir hasta 30 años, en condiciones normales. Cuandu llega'l iviernu, xeralmente'n xineru, l'osu pardu metese na osera pa pasar hibernáu tola época fría, normalmente hasta marzu. Ye de los que menos hibernen, porque hailos que lo faen hasta siete meses al añu. Les madres que tan esperando fíos empiecen antes que'l restu la hibernación y les que tienen les críes durante l'iviernu nun salen con elles hasta abril o mayu. Durante el tiempu qu'hibernen queden fechos un duviellu, respiren muy pocu y l'intestinu casi nun funciona.

Alimentense consumiendo les grases acumuláes durante la seronda, anque nun ye raros velos delles vegaes dar una vuelta pela ñeve. Les oseres son pequeñes y tan en sitios onde ye permalo p'alcanzar los humanos (nun tienen un pelu de tontos). Cuanto más pequeñes, mayor seguridá y menos frío. Suelen ser cueves naturales o furacos agrandáos que preparen pa vivir con un buen colchón de la materia vexetal que atopen nel rodiu la cueva: mofu, felechos, rames.

L'osu ye un amante de la soledá. Pa él nun hai nada comu'n paseu solitariu, una buena fartura y un pigazin a la solumbra un arbol. Ente ellos relacionense, pero pa ver munchos xuntos tien que dase un casu especial, por exemplu una viesca llena d'andrinos.

Ente los 3 y los 5 años, l'osu ya ta maduru sexualmente, y desde esi momentu anicia a buscar compañeru o compañera. Pero la cosa ta perdificil, porque queden pocos exemplares y tan dividíos en dos zones separtaes ente si, lo que complica tantu encontrar parexa comu garantizar la superviviencia, ya que el apareamientu endogámicu, ente miembros de la misma familia, debilita la especie. La época de celu ye de mayu a xunetu, pero ye en payares cuandu s'anicia la xestación. Hacia xineru, en plena hibernación, paren les críes, normalmente dos, machu y fema, anque el númeru puede variar ente unu y cuatru. Al nacer los cachorros, solu pesen 350 gramos, diez veces menos qu'un bebé humanu y tiren los primeros meses mamando y durmiendo. Gracies a la lleche de la madre, crecen munchu y hacia abril o mayo, cuandu salen de la osera, dan ya los primeros pasos.

Son unos animales muy esperimentales y xuguetones, nun paren de retozar y metese en líos de los que suel sacalos mama osa, siempre pendiente de los esbardios nestos primeros años de vida. Ente partu y partu pasen, comu mínimu, dos años. La principal actividá del osu durante el día ye buscar comida. Desta alimentación depende tamién la reproducción de la especie; si les oses nun tan bien cebáes, los esbardios tendrán más oportunidáes de morrer. Durante la ultima metada del branu y la seronda, estos animales comen munchos frutos y lleguen a coyer casi 40 quilos de sobrepesu, que seran de los que vivan durante'l periodu d'hibernación . Un día de alimentación adecuada val-yos pa vivir cinco díis hibernáos.

Los osos son onmivoros, esto ye que comen de tóu. Ensin embargu, el 85% de la so dieta ye vexetal. Comen herbáceos en primavera y forren coles carroñes de los animales muertos nel iviernu y con insectos. En branu lo que aprovechen son los frutos carnosos (mazanes, mores, andrinos, cereces..) y n'iviernu los frutos secos (castañes, ablanes, beyotes…). El platu animal más habitual son los insectos (hormigues, abeyes y larves d'escarabayu) y si come dalgún gran herviboru (ciervos, rebecos o corzos), ya tan muertos cuando llega. Solu de vez en cuandu caza dalgun páxaru o pequeñu mamíferu. Pero l'osu ye un golosu ensin remediu.Lo que más y presta ye garrar por banda un panal y comer tola miel que pueda. Asina ye que, dende antañu, los asturianos esmolecieronse en proteyer les colmenes con un muru altu (puede llegar hasta los 3 metros). Esta construcción conozse col nome de cortín. Dientru tan les colmenes nuna especie de caxes que se llamen truébanos y que tradicionalmente taben fechos con troncu de carbayu o castañu. Al cortín entrase por una escalera, que se dexa tumbada y si tien puerta, cubrese por fuera con clavos, que l'osu ye muy pillin y más d'una abrió. A coyer la escalera entoavía nun llegó, eso si.

La relación del osu col agua ye tamien constante nun sitiu comu la cordillera, llena de mananciales, ríos, llagos y charques. Disfruta munchu col llíquidu elementu, y nun sólu lu usa pa beber sino tamién pa bañase y refrescase y, si cae, pescar daqué.

Pero l'osu pardu ta llegando al fin. Fae 700 años llegaben hasta Sierra Morena. Los sieglos XVII y XVIII fueron terribles pa los osos nel nuesu país. Desaparecieron totalmente nel centru y sur de la península y los osos de la Cordillera Cantábrica y de los Pirineos, hasta entonces xuníos, separtáronse. Güei queden menos de 10 nos Pirineos y malapenes 80 nel cuadrante suroccidental d'Asturies. Varies fueron les razones de esta estinción, pero detrás de toes elles ta siempre la mano humana. Ye cierto que na busqueda de alimentos podíen dañar alguna propiedá de la xente de la zona, inclusu destrozar cortinos enteros. En consecuencia los dueños de les colmenes y los ganaderos solíen poner trampes, venenu o matalos a disparos.

Güei, los pocos daños que pueden causar los que queden, paguenlos les Comunidáes Autónomes, colo que la caza d'osos por esti problema ta eliminada. Y de tolos modos, estos daños son pequeños. Una mas de les razones de la so estinción ye que l'osu fue consideráu durante munchu tiempu el mayor trofeu de caza, y los sos cazadores unos héroes. Podemos ver testimonios nes imáxenes de la época. Los cepos y los chuzos yeren les armes más usáes. La caza del osu pardu ta vetada desde 1973 y el osu consideráu especie protexía.

L'aprovechamientu los recursos naturales, fizo llegar al home a los sitios inaccesibles onde l'osu tenía la morada. Esto fue tamién arrinconándolu ya que cuandu l'home llega, l'osu vase. Lo mesmo acontez coles obres de minería y obres públiques, la construcción de nueves carreteres y pistes y el turismu nos picos. Asina, resumiendo, la mortalidá no natural y la pérdida del so habitat, son les dos grandes razones de la regresión desta especie.

Al Principáu d'Asturies, en cuyu territoriu viven en tornu al 80% de los osos que queden na península, cuerrespuende-y, comu depositariu desti patrimoniu, una responsabilidá perimportante: participar na preservación de l'osu pardu pal restu d'España y les xeneraciones futures. A ver lo que faemos.

Pilar Sánchez Vicente