Esti añu los magos escueyen cultura n'asturianu

Avientu 20, 2009 por I.D.T

Como tolos años per estes feches los más de les neñes y neños asturianos yá tán escribiendo les cartes a los reis magos enfotaos en que-yos traigan esi vidiuxuegu o esos patines que tanto-yos presten. Nesti espaciu na Rede tamién tamos enfotaos en que los magos arrecostinen muncha cultura n'asturianu pa los más pequeños, y pa eso vamos dar dalgunes idees y suxerencies.

¿Qué llibru escoyer?
Na Biblioteca d'A la gueta yá tenemos encamentao bien de novedaes de Lliteratura Infantil y Xuvenil n'asturianu. Asina por exemplu rescamplen títulos como "Nosotros, los pexes" de Miguel Solís Santos, "Ello ye too la xente que nun nos compriende" de Pablo Rodríguez Medina, "¡Cómo te güelen los pies!" de MªLuz Pontón, "El club social d'altos vuelos" de Vicente García Oliva o "Toya yá ye grande" de Xulio Berros, pa los más mocinos. Pa los qu'entovía nun tienen tantu vezu llector son tamién bien recomendables títulos como "¿De qué tará fecha la lluna?" de Miguel Rojo, "Menú de Versos" d'Esther García López, "Nora, la neña de sal" de Fátima Fernández, o "Bruxes males bones bruxes" de Francisco Pimiango.
D'otra manera cabe destacar y encamentar especialmente los llibros premiaos pola Crítica d'Asturies na modalidá de LLIX: "Les coses que-y presten a Fran" de Berta Piñán y "Los viaxes de Tin y Ton" de Miguel Rojo. Amás nesta categoría de llibros premiaos nun pue dexar de citase un álbum ilustráu que ye un regalu ensin mesmu pola belleza del testu, ganador del Primer Premiu MªXosefa Canellada de LLIX, y el procuru puestu nes ilustraciones y edición. Tamos falando del álbum "Arroz, agua y maíz" de Berta Piñán y dibuxos d'Elena Fernández.
Tamién dientro de les novedaes d'esti añu cabe citar tres de los llibros espublizaos na fala del navia-eo: "Binoca" de Marisa López Diz, "Rebelión na caixa máxica" d'Aurora García Rivas y "Domingo y os animales" de Belén Rico.
D'otra manera, y si lo que se trata ye d'alcontrar bona lliteratura n'asturianu pa los nuevos llectores siempre pue echase mano de los clásicos d'esti tipu de lliteratura. Asina por exemplu nun van decepcionanos autores como Vicente García Oliva, Xulio Berros, Miguel Rojo, Marisa López Diz, Miguel Solís Santos, Esther García López, Carme Martínez o Pablo Rodríguez Medina.
 
¿Por qué non una torna al asturianu?
Si bien ye interesante averar a los más mozos a la lliteratura n'asturianu pente medies de los autores y les obres llariegues, la LLIX n'asturianu cuenta tamién con tornes d'bres fundamentales. Asina por exemplu la obra estrella d'estes navidaes va ser "Harry Potter y la piedra filosofal" na torna de Xesús González Rato y edición de Trabe. Rescamplen tamién nesti sen "Les aventures de Colasín" de René Goscinny, "La Papateca" de Dennis Whelehan, "El Principín" d'Antoine de Saint-Exupéry o "La hestoria del xatu Fernando" de Munro Leaf.
 
¿Qué tal un poco de música?
Ensin dulda'l referente dientro del ámbitu de la música n'asturianu pa la reciella ye'l grupu que dirixe'l maestru Nacho Fonseca: "Xentiquina". D'esta miente'l regalu musical d'estes navidaes nun pue ser otru qu'el nuevu discu d'esta formación "El sapu y la lluna". Asina mesmo rescampla tamién un discu bien recomandable como ye "Poemes de Carambelu", trabayu que musica los poemes del llibru de Marisa López Diz, poniéndo-y ella mesma voz a les sos pallabres.
 
Seya como seya, y escoyéndose la opción que s'escueya, yá que quedaron munches obres prestoses ensin citar; lo importante ye apuntar na llista que, ente los vidiuxuegos y los patines, los magos tamién tienen de traer cultura n'asturianu.
 

Enllaz permanente