El Bloque diz que los oxetivos colos qu’entró nel Gobiernu tán cumpliéndose

El Bloque por Asturies entró nel gobiernu colos oxetivos de parar el banzáu de Caliao, la incineradora, afrontar la crisis dende la esquierda y parar una reforma del Estatutu “regresiva p’Asturies”. Pal Bloque, según espeyó güei’l so portavoz nacional, Pablo Fernández, estos oxetivos tan cumpliéndose polo que van siguir trabayando dende tolos ámbitos y van asumir les nueves responsabilidaes “dende la llealtá a la coalición, el compromisu con Asturies y cola responsabilidá demostrada nos conceyos y nel Gobiernu”.

Una responsabilidá na que tomará parte destaca a partir d’agora Roberto Colunga Fernández, Secretariu Xeneral del Bloque dende la so fundación y sustitutu de Valledor nel so escañu na Xunta Xeneral. Ésti xixonés de 39 años ye asesor de cultural tradicional y llingua na Xunta de Gobiernu del Conceyu de Xixón, dende onde impulsó’l festival Xixón 5º40’. Foi miembru de la Xunta Rectora Tradicional de la Fundación Municipal de Cultura y de la Universidá Popular de Xixón. Miembru fundador d’Izquierda Nacionaliega d’Asturies y del propiu Bloque por Asturies. Anguaño ye hosteleru y entrenador d’ún de los equipos inferiores del C.D. Mª Rubio.

Pablo Fernández amosó tamién el respetu de la organización pola renuncia de Francisco Javier GarcíaValledor como diputáu de la coalición IU-BA-LV. Del mesmu mou, calificó como escelente’l so trabayu “al serviciu d’Asturies” como Conseyeru de Xusticia y diputáu de la Xunta Xeneral y dixo que’l Bloque “sentía muncho la so marcha”.
 
Na rueda de prensa comparecieron el mentáu Pablo Fernández, la encargada de les rellaciones cola prensa de la organización, María Lourdes Gru, y el responsable de movimientos sociales del Bloque, Nacho Martínez.