Un llibru asturianu pa los neños de Chile

La editorial Pintar-Pintar acaba dar anuncia, pente medies d'una nota de prensa, de la escoyeta d'un llibru asturianu pa formar parte de les Biblioteques Escolares chilenes. Concretamente serán 1.020 exemplares del llibru "Malva y el paragües máxicu" na so versión en castellán los alquiríos pol Ministeriu d'Educación del país andinu.
"Malva y el paragües máxicu" s'espublizara nel añu 2008 con una versión orixinal n'asturianu obra de la escritora Marisa López Diz y la ilustradora Elena Fernández. El llibru cuenta la historia de Malva, una neña que de camín a casa los güelos a la que va a pasar el branu, conoz a un estrañu personaxe que fairá inolvidables les sos vacaciones.
Marisa López Diz ye una de les autores más prolífiques dientro del ámbitu de la Lliteratura Infantil tanto n'asturianu como en fala del navia-eo. Asina nos últimos años tien espublizaos títulos como "Poemes de carambelu" o "Binoca" y ganao premios tan prestixosos como'l Fernán-Coronas na edición de 1998 o'l Premiu de la Crítica d'Asturies precisamente na modalidá de meyor obra de LLIX n'asturianu.