La misa del gallu

Depués de cenar yera de tradición dir a la famosa Misa de Gallu. Nos nuestros díes les más d'elles celébrense de tarde pa que la xente disfrute de la cena tola nueche. Pero tovia hai munches que celebren entá esta misa a la so hora orixinal... a les doce la nueche.

D'antiguo yera de gran tradición deir a la Misa de Gallu, un auténticu alcuentru social pal pueblu o parroquia que la celebraba. Independientemente de la so tradición relixosa, esta'l pueblu o parroquia que la celebraba, que, amás de la so tradición relixosa, simbolizaba la comuña de tolos vecinos pa celebrar la llegada de la Navidá y tornábase tamién nuna fiesta pa una sociedá que nun gozaba de tantos divertimentos comu agora.

Los vecinos aguantaben el fríu o la ventrisca con tal d'allegase a la ilesia parroquial a participar del acontecimientu, pues yera una celebración mui participativa... cantaben los coros villancicos y canciones del Nadal, y depués faciense representaciones teatrales: los célebres Misterios de Navidá o Autos de Navidá, con diálogos ente xente que facia de pastor, d'ánxeles, y d'otros personaxes nadaliegos. En dellos llugares, yera costume que les moces ficieren muñequinos de trapu cola figura del Neñu Dios que depués yeren espuestes nes cases o na ilesia pa ser oxetu de veneración.

Ye esta otra costume popular na que podemos achisbar l'orixen más remotu de los Belenes o Nacimientos, una tradición cuyu aniciu pué sumise nel tiempu más remotu y de la que se sabe que fuere popularizada per tola Cristiandá polos flaires franciscanos.

Na mesma representación de los Autos de Navidá podien empezar a apaecer yá les primeres mazcaraes...gurrios, sidros, zamarrones, bexigueros, y bardancos, ente otros munchos seres y personaxes que nos traen l'anuncia que empieza'l ciclu del Antroxu al gritu de ¡¡ Antroxu yá, el día de Navidá!!, talu comu pué vese nel apartáu que dedicamos a estes fiestes antroxeres.