La XDLA reclama a Pérez Ornia y a Consuelo Vega qu'actuen pa que la RTPA use la toponimia asturiana

La Xunta pola Defensa de la Llingua Asturiana vien d'unviar cartes al direutor de la RTPA, José Ramón Perez ornia, y la direutora xeneral de Política Llingüística, Consuelo Vega, onde se-yos pide que dean instrucciones concretes y faciliten los decretos d'oficialización toponímica pa que la radio televisión pública cumpla cola llegalidá vixente.

La organización de defensa del dioma tomó'l determín d'unviar les cartes depués de que la Conseyería de Cultura presentara la selmana pasada una campaña mediatica, que yá se pudo ver na propia TPA, de promoción de la toponimia oficial n'astruianu

La Xunta entiende que la RTPA, como organismu públicu, tien que cumplir cola llegalidá en materia toponímica, "pero tamos viendo que nun ye asina a pesar de les campañes qu'informan de qu'agora son oficiales y qu'usalos ye lo normal". Poro, piden-y al direutor del Ente que faiga llegar a los servicios informativos y a les productores los decretos d'oficialización que se vaigan publicando nel BOPA, "de la mesma manera qu'apliquen al detalle les circulares del Gobiernu n'otres cuestiones".

La XDLA critica que mientres nos informativos delles veces usen los topónimos oficiales nos lletreros qu'acompañen la información, poques veces s'usen de forma oral. Según recomienden "la toponimia oficial habría respetase na programación en castellanu tanto en rótulos como nel usu oral. Nel casu de los topónimos que s’aprobaron con una forma doble sería absurdo usalos d’esa manera oralmente y, nesi casu, por una cuestión de discriminación positiva, paeznos habría qu’usar la forma asturiana, que ye la que se quier recuperar, porque si non quedaría condenada a que nunca se pronunciare na televisión y la radio públiques».

Na carta a Consuelo Vega, recuerden-y que como responsable de la política llingüística tien que tomar «les midíes que faigan falta paque’l Gobiernu dea instrucciones al ente de radiotelevisión pa ques’aplique d’una vez por toes la llegalidá vixente».