García Oliva fala de la necesidá d'ellaborar una Historia de la LLIX n'asturianu

L'escritor y académicu de la llingua Vicente García Oliva presentó dientro del marcu de les Xornaes d'Estudiu qu'organiza l'Academia de la Llingua na Facultá de Filoloxía de la Universidá d'Uviéu, la charra titulada "Apuntes pa una Historia de la Lliteratura Infantil y Xuvenil (LLIX) n'asturianu". Historia, qu'a xuiciu del escritor "a trenta años del nacimientu de la LLIX n'asturianu yá ye hora d'atropar estos materiales y esponelos, de forma curiosa, a la lluz pública".
  García Oliva dio dellos apuntes sobre les bases pa ellaborar una historia de la lliteratura infantil y xuvenil, considerando, lo mesmo que l'estudiosu Severino Antuña, como aniciu de dicha lliteratura'l 'Montesín' de María Xosefa Canellada. Con too sorrayó asina mesmo la importancia de la lliteratura oral mui anterior a esti momentu y a la presencia de tornes de testos clásicos talos como "El Principín" anteriores tamién a esa primer obra de la escritora de Cabranes. 
No que cinca a la organización formal del trabayu García Oliva echó mano d'una organización cronolóxica al empar que temática, que dende'l so puntu de vista podría dividise nes siguientes etapes: "el didactismu" col nacimientu d'obres empobinaes a la alfabetización n'asturianu de los más neños; "El traduccionismu" cola apaición de tornes d'obres clásiques espublizaes tanto por editoriales asturianes como estatales; "El Mitoloxismu" caracterizada pola bayura d'obres con temática mitolóxica y pa finar lo que denomó "L'esporpolle" de la LLIX n'asturianu.
Pa finar, y como factores principales d'esi esporpolle Vicente García Oliva citó la riqueza temática, la incorporación de nueves editoriales o la profesionalización de los ilustradores ente otros. Factores que contribúin al "afitamientu definitivu d'una etapa que sigue xorreciendo y meyorando hasta yá sabremos ónde" apuntó.