El Principáu exixe a Marruecos lliberar a siete defensores saharauis de Derechos Humanos y pide qu'España y la UE actúen
|
21 Ochobre, 2009 por E.P. / Redacción
- Inicie sesión o rexístrese pa espublizar comentarios
El director de l'Axencia Asturiana de Cooperación al Desarrollu del Principáu d'Asturies, Rafael Palacios, exixó güei a delles instancies del Gobiernu de Marruecos la puesta en llibertá de siete defensores saharuis de Derechos Humanos deteníos nel aeropuertu de Casablanca'l pasáu 8 d'ochobre, tres visitar los campamentos de refuxaos saharauis de Tinduf.
De la mesma manera, solicitó al Gobiernu d'España y la Unión Europea qu'actúen ante lo que califica de "fechu sin precedentes". Asina refirióse a la "detención illegal" d'estes siete persones y l'acusación de traición y collaboración col enemigu, polo que los xulgará un Tribunal Militar de Marruecos que los pue condenar a muerte.
Palacios tuvo acompañáu en rueda prensa pol vicepresidente del Observatoriu de los Derechos Humanos nel Sahara Occidental, Jesús María Martín-Morillo; y el vicepresidente de l'Asociación d'Amigos del Pueblu Saharaui, Alberto Suárez.
El responsable autonómicu remarcó que los siete deteníos --Ali Salem Tamek, Brahim Dahane, Degja Lechgar, Rachid Sgahir; Nassiri hamadi, Yehdih Terruzi y Saleh Loubeihi--, son "defensores de los Derechos Humanos", y afirmó que si España y la UE siguen en silenciu "va haber que señalar la so complicidá con esta situación".
Martín-Morillo relató lo asocedío dende la detención asocedida'l 8 d'ochobre, que considera una "burlla" a les Naciones Uníes y alertó de que se producen "por motivos políticos y idelóxicos". De la mesma manera, señaló qu'hasta'l 12 d'ochobre nun s'informó a les families de la detención y tuvo sin asistencia lletrada y con réxime de visites suspendíu.
Alberto Suárez condenó la detención illegal, y exixó la so puesta en llibertá, al tiempu qu'encamentó al Gobiernu del Principáu, d'España y de la Unión Europea que condenen la postura de Marruecos. Tamién apuntó que nun se los pue xulgar por traición, porque nun son ciudadanos marroquís, sinón saharauis.
D'esta manera, Rafael Palacios calcó na condena del Gobiernu asturianu y el pidimientu de que se produza "la so lliberación darréu, amás de garantizar el respetu a la so vida, y a la so integridá física, psicolóxica y a la de les sos families".
De la mesma manera, señaló qu'ún de los deteníos, Brahim Dahane, convidólu'l Principáu a visitar Asturies los díes 29 y 30 d'ochobre, pol so llabor na defensa de los Derechos Humanos y l'autodetermín del pueblu saharui.
A lo últimu, entrugóse si España y la UE quieren siguir calteniendo rellaciones comerciales y d'amistá con un réxime como'l marroquí, a la vez que dixo que s'equivoca'l que "piensa que'l pueblu saharaui va siguir aguantando la marxinación", polo que volvió calcar na necesidá de que faiga efectivu'l derechu d'autodetermín y soberanía saharaui.
Efrén d'Andrés
Comentarios
Sí hom. Que pierda tiempu, esfuerzu y les perres d'equí colos de fuera, como n'Asturies va too tan bien.
Esto ye pa mexar y nun char gota.
Totalmente desconectáu y indeferente hacia la realidá y los problemes de los asturianos. Y lleva asina un montón d'años yá. Nunca da la cara nin se preocupa por nada de lo que nos pasa n'Asturies.¿Nacionalista d'izquierda esi señor?. Entós Areces, Ovidio o Iglesias son independientistes revolucionarios.
Yo alucino. Rafael Palacios pue parecenos meyor o peor (personalmente Bloque por Asturies nun ye la mio opción política) y podemos critica-y que faiga esto o dexe de facer lo otru, pero criticar que'l Principáu condene la detención de dos sah.arauis que nun fain otro que lluchar pola llibertá d'un pueblu que vive refuxáu nel desiertu arxelín, nuna de les zones del desiertu del Sáh.ara onde la vida ye más difícil... home, eso yá me paez descentrar la pelota. Esto ye, que como n'Asturies tenemos problemes (munchos, sí, pero tu, como yo, comes tolos díes y hasta tienes pa gastar en internet) nun podemos solidarizanos con otra xente. Nun sé si Palacios será nacionalista d'izquierdes, lo que ta claro ye que tu d'izquierdes tienes menos qu'Ovidio Sánchez.
Tírame'l pih.u Rafa Palacios, pero, por dios, solidaridá col pueblu sah.araui.
Tienes razón. Será mui d'izquierdes (como demuestra'l so desinterés pola situación llaboral llaceriosa de miles d' asturianos y el so apoyu a una xuba d'impuestos nuna comunidá onde los mileruristes son mayoría), pero'l so nacionalismu asturianu acoxa escandalosamente. El llabor d'un nacionalista nun pactu de gobiernu ye EN PRIMER LLUGAR DEFENDER LOS INTERESES DE LOS ASTURIANOS. Y ello nun quita pa que tamién se solidarice coles inxusticies cometíes con otros pueblos y otra xente. Pero ESCAECER LOS INTERESES DE LOS ASTURIANOS pa dedicase namás que a solidarizase con toles causes inxustes del mundu nun ye'l llabor a realizar polos NACIONALISTES ASTURIANOS dientro de les INSTITUCIONES ASTURIANES.
Nel momentu de crisis cultural qu'Asturies ta atravesando, cola so llingua al borde de la estinción, tol esfuerzu ye poco pa lluchar pola so supervivencia. Y él ye l'únicu diputáu comprometíu voluntariamente cola nuesa causa de los 45 que tán esfarraplando'l nuesu país. Poro, él débese a los asturianos que, amás de votalu, páguen-y el sueldu (neto qu'a los otros 44, pero esos persábese que son l'enemigu). Y viaxa más que Willy Fog.
Yo, "un de por ei alantre", creo que los recursos n'Asturies personales y crematísticos tán llimitaos, colo que tenemos que centramos no que más mos importa. Que son los sah.arawis pues norabona pa ellos por dir a saca-yos xente de fuera les castañes del fueu. Pa mi son los asturianos, la mio xente, y, sobre too, la educación, alimentación y la fala del mio fiu, porque nun tengo la sueerte de que dalguien venga pelear por nós.
Fíxeme la promesa de nun lleer y muncho menos retrucar sobre los comentarios que faen davezu delles persones n´estes páxines y/o foros "asturianistes", pero llegó´l momentu que nun pude aguantame sin decir daqué.
En 35 años más o menos de compromisu col asturianismu/nacionalismu, enxamás pensé que podía llegar a facese comentarios tan sectarios, destructivos, despreciatibles, etc, contra persones, asociaciones, partios o cualesquier aconceyamientu de xente asturiano que trabaya pol país y la so xente, anque nun se compartan dalgunos plantegamientos, anque se discrepe ; y pa encima que lo faigan persones que se dicen nacionalistes y de izquierdes
Quiero decivos que pa min demostrais un nivel políticu, intelectual de tal probetayería que mete mieu.Representais la gafedá, y probablemente nun sepais, porque nun llegais a ello, que les vuestres opiniones son xenófobes , racistes y totalitaries en la mayoría de les veces.
Si pensais que sois d´izquierdes y que sois nacionalistes ye porque la ignorancia ye mui atrevida.
Hasta siempre
"Sectarios, destructivos, despreciables, probetayos intelectuales, gafos, xenófobos, racistes, totalitarios, ignorantes..."
Magnífica, maxistral, impresionante, llúcida... argumentación. Chapó D. Despistáu.