Mobiliariu y Axugal

El mobiliariu de la casa tradicional asturiana nun yera mui abondoso. Na cocina taba la masera, mueble con tapadera nel que s´amasaba la fornada de pan pa quince díes y onde se guardaben los panes; la espetera o fferraderu, onde engolaben les ferraes y calderes de cobre; en dalgunes cases teníen l´arrudu o palu con gayos onde se poníen zapicos, tarreñes y otros cacíos; el vasal, o armariu de cocina; l´escañu o bancu asitiáu alredor del llar, que facíq d´asientu, de mesa y de cama; y les tayueles o bancos de tres pates. Na cocina había amás cacíos de maera como la zapica, copita o peya, qu´usábase pal llechi y la sidra; el saleru y pimenteru con tapa xiratoria; el morteru´l sal; les escudielles nes que se comía cola cuyar, tamién de maera; les desques o duernes p´amasar el tortu o pelar les patques y el talo onde se cocía´l tortu arrodiáu de fueyes de maíz o figal, la chocolatera col molinillu de abayar, el canxilón de beber, y si´l llar nun bastaba p´allumar taben les candilexes tamién de fierru, calderes de cobre, tarreños vedríos o ensin vedriar, la batía o feridera pa facer la mantega, la quesera con furacos, etc.

Nos cuartos, la cama de maera con cabeceru talláu, y l´arca onde se metía la ropa col so estoxu pa los bixos, completaben el mobiliariu de la casa.

No tocántenes al traxe tradicional asturianu pué dicise que ye la tipificación de la última forma de vistir que se reconoció, yá na so dómina, como distintiva de los habitantes del nuesu País. Los sieglos de más llustre van del caberu cuartu del XVIII fasta mediaos del XIX, momentu dende´l que foi desaniciando sele fasta desapaecer. Yera una vestimenta propia del pueblu, y anque presentaba rasgos propios, en xeneral respondía a los cánones usaos na mayor parte d´Europa Occidental. Col pasu´l tiempu, al nun ser camudáu por otra forma de vistir personalizadora, quedará como seña d´identidá na vestimenta festiva tradicional asturiana.