La Villa acueye'l I Festival del Llibru Infantil y Xuvenil

El conceyu de Villaviciosa acoyerá'l Primer Festival del llibru Infantil y Xuvenil d'Asturies. Asina lo facíen público esti martes 13 d'ochobre a les 12.00 hores nun actu celebráu na sede de la Conseyería de Cultura y Turismu, organizadora de los actos conxuntamente cola mancomunidá de la Comarca la Sidra y l'Ayuntamientu de Villaviciosa. Les actividaes, que tendrán llugar del 15 al 18 d'ochobre, concentraránse nel patiu de les Escueles Graduaes de La Villa (Plaza Obdulio Fernández Pando).
Nel actu tuvieron presentes la directora xeneral de Política Llingüística del Principáu, Consuelo Vega, acompañada del presidente de la Mancomunidá y alcalde de Cabranes, Alejandro Vega, la conceyal de Cultural del Ayuntamientu de Villaviciosa, Ana López, y la presidenta del Gremiu d'Editores Asturianos, Marta Magadán.
Consuelo Vega destacó l'eventu como una manera d'averar a los mozos y moces a la lliteratura asturiana y n'asturianu. Calcó nel puxu del que goza nesti momentu'l sector editorial infantil y xuvenil y eloxó l'actividá cultural y el dinamismu de la comarca de la sidra y del conceyu de Villaviciosa, argumentos que pesaron a la hora d'organizar esti festival nel llugar señaláu.
Ana López dixo que'l conceyu maliayu ta "encantáu" con esta iniciativa. Al so xuiciu, contribúi a "sacar la llingua a la cai y ayudar a esa normalización que fai falta".
Marta Magadán, pela so parte, señaló l'aumentu de la edición de llibros infantiles y xuveniles, gracies a "un grupu d'escritores dedicáu a ello, pero tamién a otros qu'escribíen temática p'adultos y que tán trespasando la frontera hacia la lliteratura xuvenil". Por esti motivu, valoró esta iniciativa de la Conseyería.
Alejandro Vega consideró que la Comarca de la Sidra ye un "marcu afayaízu" pola bayura d'escritores n'asturianu que tien, y señaló l'exemplu de la cabraniega María Xosefa Canellada. Mostró tamién el compromisu de la Mancomunidá y de los conceyos que la integren nel espardimientu de la llingua y la cultura d'Asturies.
Toles actividaes tendrán llugar nes Escueles Graduaes de Villaviciosa, onde habrá un estand del Gremiu d'Editores onde s'ofrecerán les diferentes publicaciones. Los dos primeros díes prevése la visita de más de 1.000 escolinos de diferentes centros educativos de la comarca, pa los que tán preparaes actividaes como l'actuación de la cuentacuentos Olga Cuervo, un taller d'escritores, una esposición sobre'l personaxe "Montesín" creáu pola escritora cabraniega María Xosefa Canellada, un espectáculu de maxa a cargo de José Armas El Ilusionista, y la presentación del DVD interactivu "Colás y Xana. Vivir n'asturianu", preparáu pola Conseyería, ente otres actividaes.
Yá dedicaes al públicu en xeneral presentaránse dellos llibros: "Menú de versos", d'Esther García (xueves), "Bruxes males, bruxes bones", de Francisco Pimiango y "Animalinos, Animalaes, Los animales y La Primavera" de Sabel Tuñón, Lurdes Álvarez y l'ilustrador Enrique Carballeira (vienres), "Cómo te güelen los pies", de Mari Luz Pontón y "Arroz, agua y maíz", de Berta Piñán, (sábadu).
Amás actuará esi mesmu día, de magar les 18.00 hores, Alfredo González, cantautor ganador del Premiu al Meyor Cantar n'Asturianu en llingua asturiana, y Tejedor, el domingu a les 12.00 hores de la mañana. Otres actuaciones musicales, previstes pal sábadu y el domingu serán les de los grupos "Doctor Centollu", "Mosquitas Muertas", "Bichosaurios", "Fracaso escolar" y "Pingüinos asesinos", toos ellos compuestos por escolares. L'actuación teatral a cargu del grupu Nun Tris completa la llista d'actividaes.
 
 
Pues consulta equí'l Programa Completu.