Preséntense en L'Arribada les últimes novedaes de llibros en gallego-asturianu

El próximu xueves día 1 d'ochobre, y dientro de les actividaes de L'Arribada Vagamar Lliteraria, van presentase nel Muséu del Ferrocarril de Xixón les últimes novedaes de Lliteratura Infantil escrites en fala eo-naviega.
Asina Marisa López Diz presentará Binoca, el cuentu del "neno col pelo del color das espigas del meiz e listo como el raposo" qu'asoleyara'l pasáu añu la editorial Pintar-Pintar. De les histories d'otru neñu fala tamién el llibru de Belén Rico Domingo y os animales testu col que la Editorial Novel da'l pasu hacia la edición na fala del eo-navia. La tercer de les presentaciones complétase col títulu d'Aurora García Rivas Rebelión na caixa máxica nesti casu editáu por Trabe na so colección "Montesín" y que trata d'una caxa máxica de la que pue surdir tolo que se desee.
 
Esi mesmu xueves, ya inmediatamente dempués de les presentaciones programaes pa les 17.00 hores, tendrá llugar amás una tertulia al rodiu de la situación de la Lliteratura Infantil en fala eo-naviega na que participarán les tres autores.