Ellos tamién fueron pa la escuela

Coordináu pol escritor Miguel Rojo, la editorial Ámbitu acaba de sacar el volume de cuentos "Dir pa escuela", una recopilación d'alcordances escolares cuntaes nes voces de venticinco de los nuestros escritores más reconocíos.
En pallabres de Rojo "onde se foi la primer vez a la escuela ye, ensin duda, el llugar qu'hai enantes de "ser de nengún sitiu", esi llugar primixeniu qu'igual nun vien nos mapes xeográficos, pero que sí ta nesi otru mapa sentimental que toos guardamos dientro como una xoyina y que cai mui a la vera del corazón".
Asina, y col enfotu d'averanos a una escuela que queda bien a desmano pa les nueves xeneraciones, participen nesta esbilla autores nacíos enantes de 1970; persones a les que-yos tocó vivir el Franquismu, les escueles graduaes, los maestros vocacionales d'idees progresistes, y a la fin un conceptu d'enseñanza qu'espeyaba na semeya del neñu y neña que fueron, y qu'apurren pa esti llibru los más de los autores.