UNIDÁ presenta la so propuesta de modelu d'estáu

"La cabeza de llista al Congresu pola coalición UNIDÁ, Lali García Rubiera, acompañada del cabeza de llista al Senáu, Ignaciu Llope, presentó esta mañana les sos propuestes electorales venceyaes al modelu d'estáu y el papel d'Asturies nel mesmu. García alvirtió sobre ""la condición marxinal d'Asturies nel panorama políticu d'anguaño, atopándonos con un estatutu de tercer división que nin siquiera pudo votase y que nun reconoz elementos esenciales como la oficialidá de la llingua asturiana nin la condición nacional del nuestru país"".

La cabeza de llista afirmó que ""anguaño nun hai nenguna formación política con representación que defenda abiertamente midíes que torguen la marxinación d'Asturies con una postura ensin complexos que nos asitie na primer división, reconociendo tanto la plurinacionalidá y el plurillingüismu del estáu como la necesidá de que'l nuestru país seya reconocíu como una de les naciones integrantes del mesmu. Pa too ello ye más necesario que nunca la esistencia nel panorama políticu d'una opción como UNIDÁ"".

La candidata afirmó amás que ""fai falta acabar col mitu de l'Asturies subvencionada y negociar col estáu un modelu fechu dende Asturies y p'Asturies porque ensin soberanía fiscal pa poder xestionar los nuestros impuestos nun pue haber autogobiernu políticu"".

Pel so llau Ignaciu Llope sorrayó lo dicho por García Rubiera añadiendo que ""los parámetros polos que se mide'l nivel d'inversión del estáu n'Asturies inclúin les grandes infraestructures, con un beneficiu que nun queda equí, sinón que revierte n'empreses foriates dexándonos la destrucción del mediu ambiente"".dende'l puntu de vista del candidatu al senáu ""los asturianos somos los que más aportamos n'impuestos venceyaos col consumu"".

Al empar, recordó que ""ye posible que la configuración del gobiernu estatal dempués de les elecciones del 9 de marzu lleve a la evolución del estáu camín d'un modelu nel que se consagren constitucionalmente les diferencies ente los pueblos que seyan consideraos nación y los que son consideraos rexones"". Llope siguió comentando que ""tien más pesu na decisión del nuestru futuru un diputáu de Soria, Madrid o Aragón qu'un ciudadanu asturianu y los representantes asturianos en Madrid son brazos de madera al serviciu de les maquinaries electorales de los grandes partíos, polo que ye necesaria una alternativa que namás respuenda a los intereses d'Asturies"".

Pa pone-y el puntu a les declaraciones, la candidata al Congresu por UNIDÁ, Lali García Rubiera, conseñó cuatro de les midíes qu'UNIDÁ inxer nel so programa:

1. Reconocencia del calter plurinacional, pluricultural y plurillingüísticu del Estáu, con Asturies como una de les entidaes nacionales integrantes.
2. Soberanía fiscal qu'asegure la negociación d'un modelu de financiamientu que s'adapte a los intereses d'Asturies y garantice que podamos xestionar los nuestros impuestos, compensando la nuesa marxinación histórica.
3. Presencia direuta asturiana nos muérganos de la UE pa que podamos xestionar direutamente tolo que cinque a Asturies. 4. Reforma del Senáu y camudamientu del mesmu nuna cámara de representación territorial."