La Oficina de la Llingua de Xixón lleva la llingua materna al C.P. Los Campos

"Con motivu del Día Internacional del Idioma Maternu que se celebró esti xueves, la Oficina Municipal de la Llingua del Ayuntamientu de Xixón organizó, por cuartu añu consecutivu, un actu cultural col envís de ""dar a conocer la importancia de les llingües y la diversidá cultural ente los escolinos y les escolines al tiempu que camienten sobre'l papel qu'ellos puen cumplir nel respetu y espardimientu de les llingües, entamando pola propia, l'asturianu"".

Esti añu la Oficina Municipal de la Llingua llevó al C.P. Los Campos, centru nel que s'axunten alumnos/es de 25 nacionalidaes distintes, l'actividá que consistía na llectura d'una frase nes distintes llingües, asina como la esposición de murales y trabayos al rodiu de la diversidá llingüísica y cultural de los países de nacencia, amosando amás una pequeña muestra de llibros y oxetos de les sos cultures y países.

Esti añu los neños van tener tamién la posibilidá de visitar la esposición El poema que cayó a la mar, basada nel llibru del mesmu títulu de la editorial Pintar-Pintar, con testos son d'Aurelio González Ovies ya ilustraciones d'Ester Sánchez.

Nel actu tuvieron presentes Carmen Rúa Morán , en representación de la Conceyalía de Cooperación Internacional, Cultura Asturiana y Política Llingüística, la Responsable de la Oficina Municipal de la Llingua, Mª Xosé Rodríguez López, la ilustradora del llibru Ester Sánchez, amás de la direutora del C.P. Los Campos, Miriam García Menéndez.

La Oficina Municipal de la Llingua editó tamién un cuadernu didáuticu pa repartir ente tolos/es neños/es del centru educativu nel qu'apaez un testu en distintes llingües (alemán, árabe, aragonés, aranés, asturianu, bretón, castellanu, catalán, chinu, eslovenu, euskera, francés, galés, gallego-asturianu, gallegu, griegu, inglés, italianu, polacu, portugués, premanese, romanó, rumanu, rusu y serbiu) y delles actividaes y pasatiempos al rodiu de les llingües del mundu."