La compañía "Asturmitomanía" lleva la mitoloxía a los colexos asturianos

Acaba nacer una nueva compañía de teatru n'Asturies, lleva'l nome de "Asturmitomanía" y según los sos propios miembros, "pretende espertar l'interés de los neños y non tan neños pola nuestra mitoloxía porque supón una buena forma de descubrir y d'entender la nuestra cultura, al traviés d'interesantes representaciones teatrales que recueyen y recreen, d'una manera lúdica, les raíces mitolóxiques del pasáu xunto con temes d'anguaño".
La compañía, formada por Lucía Colunga, Sheila Montes, Rosa Ana Muñoz y Paula Alonso, y dirixida por Mª Luz Pontón; sorraya'l so "procuru porque la xente qye vaya a ver les nuestres representaciones teatrales lo pase perbién, pero gustaríanos sobre manera qu'a traviés d'elles se refiercen los valores de respetu, tolerancia y solidaridá".
Les sos dos primeres obres empobinaes al públicu infantil, "faigamos teatru" y "vamos a cuntar un cuentu", formen parte de les actividaes ufiertaes pola Conseyería d'Educación pa los colexos d'Educación Primaria, polo que van entamar a vese nos colexos asturianos, teniendo dambes una duración de 50 minutos.