El Vinu de la Tierra de Cangas protagoniza l’actividá de la FIDMA

|

El Muséu del Pueblu d’Asturies acueye estos díes el III Certame Vinu de Cangas dientro de les munches actividaes entamaes nel marcu de la FIDMA. Los visitantes van poder prebar y mercar productos de delles bodegues acoyíes a la IXP.
 
La llista d’empreses participantes nesti eventu ta conformada por Antón Chicote, Pesgos, Chacón Buelta y Monesterio de Corias. La Fundación Asturies XXI entama esta actividá col oxetivu de dar a conocer el Vinu de la Tierra de Cangas “como’l vinu de referencia n’Asturies”. Asina, dende ayeri y hasta mañana, n’horariu de 11 a 22 hores, esti vinu del occidente del país va tener un espaciu especial nel tendayu del Muséu del Pueblu d’Asturies, abiertu a los visitantes de la Feria Internacional de Muestres d’Asturies (FIDMA), al igual que la gastronomía de la mancomunidá Fontes del Narcea.
 
Pa esta tarde, a les 17 hores, ta prevista una presentación de los vinos por parte de los bodegueros presentes nel certame, mentes qu’una hora más tarde, nenos y nenes van poder esfrutar d’un cuentacuentos a cargu d’Helena Trejo y d’un taller de dibuxu entamáu pol grupu EPONA. Amás, güei y mañana, la música del país va ser protagonista nel Pueblu d’Asturies.