Los recortes educativos estiéndense a les Escueles Oficiales d’Idiomes

Los retayos n’Educación nun aparen. Les Escueles Oficiales d’Idiomes tamién tán afectaes, como denuncia’l sindicatu asturianu SUATEA. Restricciones d’ufierta educativa en grupos y tiempu de docencia son el nuevu capítulu.

SUATEA denuncia que la enseñanza d’idiomes “s’alcuentra agora nel puntu de mira de la hipócrita política de recortes y deterioru de la enseñanza pública”. El sindicatu denuncia la “ablucante baxada de grupos”, con 30 alumnos por clase, “la reducción de la ufierta d’horarios” sobre too nos de tarde, y la “reducción de la carga horaria”.

“Enxamás se conociera una política de restricción d'ufierta educativa, tanto en grupos como en tiempu de docencia, como ésta y, lo que ye peor, cuntando colos medios humanos y materiales abondos pa nun tener que facelo”, esponen dende SUATEA a la par qu’afirmen qu’esto asocede “cuando ta medrando la demanda d’estes enseñances”.

SUATEA añade amás qu’argumentar “qu’esiste profesoráu non necesariu ente les plantiyes de les principales EOI ye daqué más que difícil de xustificar” y denuncia qu’esta midía favorez la “costosa” enseñanza privada d’idiomes en cuenta de mantener el serviciu públicu “o incluso aumentalu según la demanda social existente”.

Práctica illegal
D’otra miente, SUATEA denuncia la illegalidá d’esta midía, yá que, tres un conflictu ganáu pol sindicatu, la plantiya ye única y namás que pue modificase por alcuerdu del Conseyu de Gobiernu del Principáu d’Asturies. “L'oxetivu de la maniobra yera consiguir que'l personal afectáu se recoloque voluntariamente en vacantes n'institutos de secundaria”, daqué qu’amenorgaría la presencia d’interinos, como señala SUATEA.