L'Arribada dedíca-y una xornada a la Lliteratura Xuvenil

"Arribada Vagamar Lliteraria", alcuentru lliterariu qu'arriba a Xixón pel mes de setiembre, dedíca-y la xornada qu'entamará a les 17.30 hores del martes 21 a la lliteratura xuvenil escrita n'asturianu.

L'acuentru, que tendrá como escenariu'l salón d'actos del Centru Municipal de l'Arena, acoyerá la presentación de dalgunes de les novedaes más esperaes pal públicu xuvenil, amás de la presentación d'un premiu lliterariu y una mesa redonda sobre'l xéneru.
D'esta miente Sidoro Villa Costales, autor del popular llibru pal públicu infantil "Nun-yos tengas perceguera" vuelve a dirixise a los llectores mozos cola obra "Mael al debalu" qu'abrirá'l turnu de les presentaciones a les 18.00 hores. Una hora dempués, y tres la mesa redonda na que se tratarán temes relativos a la vitalidá del xéneru n'Asturies, Vicente García Oliva tendrá oportunidá de presentar la segunda parte de la que fuera primer novela xuvenil n'asturianu: "Fontenebrosa II: La rebelión de los homosaurios". La obra, qu'algamara'l Premiu Montesín nel añu 2008, ye'l númberu tres de la colección "Pesllera" qu'Ediciones Trabe inagurara hai unos años col títulu del mesmu autor "Elemental, querida Lisa". Ye precisamente Adolfo Camilo Díaz, autor de "Kaos", segunda novela espublizada dientro de la coleción "Pesllera" quien fairá lo propio cola so nueva obra empobinada a los rapacinos: "El misteriu del neñu esborráu"; historia qu'espubliza asina mesmo Ediciones Trabe con ilustraciones de Tina García.