UNA anuncia una campaña sobre’l movimientu antitaurín

El voceru de cultura d’Unidá Nacionalista Asturiana, Ignaciu Llope, anunció que van entamar una campaña pa recuperar la historia del movimientu antitaurín d'Asturies y Xixón.

Asina, preparen pal primer festexu de la feria de Begoña, la dramatización del testu de Toros de Xovellanos, "que va ser representáu por un actor asturianu de teatru”

Según señalen, esti movimiento remóntase al propiu Xovellanos “y llegó a movilizar a miles de persones en 1914 alredor de la Sociedá Antiflamenquista Cultural y Protectora d'Animales y Plantes nel mesmu Xixón”. Al empar, señalen que siempre foi mayoritaria “ente los representantes de la cultura, instituciones académiques y políticos del ámbitu progresista, anque munchos intenten despintalo”.

El voceru de cultura tamién aprovechó p'amosar “tol nuestru sofitu a la decisión del Parlament de Catalunya, que ye un pasu históricu, sobre manera porque'l so orixe ta nuna iniciativa lexislativa popular” y añadió que “l'ésitu del movimientu de defensa de los animales en Cataluña va sirvir de  revulsivu pa otres zones del Estáu”.

Pa Llope “los toros son una realidá totalmente ayena a Asturies y que namás se caltienen en Xixón pol sofitu institucional del que Gocia”. Amás, afirmó que ye una práctica más propia de la Europa medieval que de la Europa contemporánea, “como yá reflexaba Xovellanos nos sos testos, colo qu'a día de güei ye a cencielles un anacronismu macabru y de crueldá animal”.