Almiten a trámite la ILP ‘Televisión ensin Fronteres’

La Iniciativa Lexislativa Popular (ILP) ‘Televisión ensin Fronteres’ que reivindica un espaciu de comunicación nes llingües del Estáu, vien de ser almitida a trámite.

La Oficina del Censu del Congresu de los Diputaos comunicó güei a Acción Cultural del País Valencianu (ACPV), l’asociación empobinadora de la midida, que les sos 559.000 robles son valides, colo qu’entama la tramitación de la ILP nel Parllamentu español, que tendrá qu’aldericar el proyeutu y votalu.

El futuru proyeutu de llei quier reivindicar los espacios de comunición común nes llingües minoritaries del Estáu, acullá de les llindes de les comunidaes autónomes. Asina, la midida quier que les televisiones autonómiques puean vese en tol dominiu llingüísticu del idioma en qu’emiten.

Pel momentu, la campaña tuvo centrada nel dominiu llingüístico catalán, anque con sofitos de les otres llingües oficiales;  vascu y gallegu. Con too, y nel casu de llegar aprobase la llei, la midida podría afeutar a Asturies si nun s’afita nel artículu qu’esi espaciu de comunicación afeuta namás a llingües oficiales.

Ye de reseñar qu’en payares de 2009, l’asociación “Leoneses por la Cultura Oral” (LECUORAL) pidió-y a la Junta de Castiella y Lleón que la TPA pudiera ser vista en Lleón, “yá que ye la única televisión qu’emite programes n’asturlleonés, llingua arreyada’l nuestru territoriu”.

Al empar, dende la Televisión de Galicia (TVG) y el propiu Executivu gallegu, hai un fuerte enfotu en que la señal de la so autonómica llegue al territoriu asturianu del Navia-Eo, yá que dende’l país vecín entienden esi territoriu como de cultura y llingua gallega.