El Gobiernu gallegu quier que la señal dixital de la TVG puea vese nel Navia-Eo

El presidente de la Xunta de Galicia, Alberto Núñez Feijoo, afitó que la TVG va seguir viéndose nes “zones gallegofalantes que formen parte de les comunidaes autónomes d’Asturies y de Castiella y Lleón”. El xefe del executivu gallegu fizo estes declaraciones demientres el Conseyu Asesor de Telecomunicaciones y Audiovisual de Galicia, onde esclarió que la canal pública gallega tien ente los sos principales funciones “la promoción y defensa de la cultura y l’idioma gallegu”.

 Col apagón analóxicu y la llegada de la TDT, la televisión gallega dexará d’emitir fuera de les llendes alministratives de la Comunidá. Colectivos de defensa del gallegu nel Bierzu, como Fala Ceive o Xarmenta, entamaron coles demandes pa que la TVG puea siguir viéndose na so fastera y en Senabria tres l’apagón analóxicu. Asina, los diputaos autonómicos socialistas de Zamora, Manuel Fuentes y Pedro Nieto anunciaron a entamos d’esti mes de payares la presentación nel Cortes castellano-lleoneses d’una propuesta non de llei p’algamar un conveníu cola Xunta gallega que permita que la señal de la TVG siga llegando a El Bierzu y Senabria.
 
Del mesmu mou, fai díes l’asociación “Leoneses por la Cultura Oral” (LECUORAL) solicitába-y a la Xunta castellano-lleonesa que tanto la TVG gallega, como la TPA asturiana pudieran vese en Lleón, “yá que la TPA ye la única televisión que tien conteníos n’asturlleonés”. Alcuerdos asemeyaos yá los tienen roblaos los gobiernos de Navarra y País Vascu pa la recepción nes dos comunidaes de la televisión vasca (ETB) o’l Gobiernu catalán y el balear pa la recepción recíproca de les sos respectives autonómiques.