Xune Elipe: “Hai que facer l’asturianu oficial na nuestra mente”

|

Xune Elipe afirmó’l que l’asturianu tien que dir con nós, “facelu oficial na nuestra mente pa que depués seya oficial na sociedá”, y asina poder esixir a l'Alministración el so usu.

El cantante de Dixebra foi’l pregoneru'l pasáu sábadu de la XIV Fiesta de la Oficialidá de la Llingua de Bimenes, celebración que conmemora que’l conceyu foi’l primeru del país en declarar la oficialidá del idioma propiu nel so territoriu. Un procesu que darréu siguieron otros conceyos, anque’l Tribunal Superior declarara nules toles mociones.

Xune Elipe afirmó que Bimenes convirtióse nun símbolu y calificó de xornada hestórica cuando l’asturianu se declaró oficial nel conceyu.” Pocos momentos foron tan intensos, tan gayoleros, tan esperanzadores pa un movimientu avezáu a les derrotes y la incomprensión”, solliñó.

Sicasí, apuntó qu’al idioma nun val namás con querelu, yá que si queremos que tenga futuru, hai que falalu: “L’asturianu tien que dir con nós a toes partes; primero tenemos que lo facer oficial na nuestra mente si depués queremos que seya oficial na nuestra sociedá”.
    
Elipe recordó que la so presencia en tolos ámbitos de la sociedá tamién depende de nós; “¿Con qué fuerza moral pidimos a l’Alministración qu’use l’asturianu si nós nun lo facemos?”. Pidió, amás, un emplegu amañosu y correctu del idioma, al empar qu’asequible y cercanu a los sos falantes naturales, “identificándonos con ellos pa qu’ellos s’identifiquen con nós”.

El músicu afirmó que había que facer ver a la sociedá en xeneral, “pero a la mocedá sobre manera”, que la llingua asturiana ye la puerta d’entrada a un mundu llamativu y prestosu. “Namás si ganamos la voluntá de les xeneraciones más nueves vamos ser quién a acolumbrar un futuru afayadizu pa la llingua”, dixo Elipe.
.
El líder de Dixebra dixo que la oficialidá ye primer pasu de la normalización del idioma, “son los cimientos de la casa”. Pal cantante, la única política llingüística de verdá ye aquella que considera a una llingua xeneradora de derechos. Cosa que pa Xune Elipe nun se da n’Asturies.

“L’asturianu vive somorguiao nun apartheid llegal que s’impunxo nesta tierra hai más de venti años cola aprobación del Estatutu d’Autonomía”, dixo, al empar que calificó de toque de queda xurídicu la situación d’anguaño, “d’escepcionalidá rara que marxina a una parte de la sociedá”.    

Con too, Elipe afirmó que la oficialidá diba llegar. Sicasí, mientres tantu, “pa que nun se nos esmuza la llingua nos llabios”, pidió l’apoyu a toles iniciatives a favor del idioma, “seyan éstes cíviques, privaes o mesmamente de la propia Alministración”. Pa finar, afirmó que cada pasu na normalización ye un llogru del asturianismu: “Hai que-yos facer ver a los responsables políticos qu’esti pueblu quier a la so llingua”.    
 
Pues lleer el pregón equí

 

Contador Estadistiques