Gales va celebrar un referendu p'ampliar l'autogobiernu

Gales celebrará un referendu p’ampliar el so autogobiernu nel primer trimestre del 2011, según confirmó la nueva secretaria de Estáu por Gales del Gobierno británicu, Cheryl Gillan.

La consulta va dexar que’l parllamentu rexonal, l’Asamblea Nacional de Gales (Cynulliad Cenedlaethol Cymru en galés), llexisle llibremente dientro de les sos competencies, anque suponga llantar un modelu de servicios públicos distintu dafechu al inglés. Anguaño, Cardiff tien que pidir autorización a Londres cuando quier introducir cambeos na normativa.

Asina, en 2011 Gales podría igualar el so autogobiernu al d'Escocia, que se prepara pa un referendu sobre la so independencia, y tener capacidá llexislativa llibre del parllamentu británicu. Al empar, el Reinu Xuníu daría un pasu más nel so sistema d’autogobiernu de les naciones que lu conformen, onde Escocia ya Inglaterra yá disponen de sistemes sanitarios y polítiques públiques bien distintes.
 
Más d'una década d'autogobiernu
 
Los nacionalistes del partíu Plaid Cymru, dirixíos por Gwynfor Evans, consiguieron por primer vegada representación nel parllamentu del Reinu Xuníu en 1966, y convirtieron la “devolución” de les instituciones galeses nel so principal oxetivu políticu. Nel referendu de 1979 ganó'l votu negativu, pero en 1997 nun nuevu referendu ganó'l sí per un estrechu marxe, lo que permitió la creación d'un parllamentu galés en Cardiff.