El Gobiernu escocés asoleya'l proyeutu sobre la independencia

L'executivu escocés, presidíu pol nacionalista Alex Salmond, fixo públiques les entrugues que va proponer pal referéndum d'independencia pol que los escoceses van decidir el so futuru.

Más poderes pal Parllamentu d'Escocia, sí o non. Independencia, sí o non. Son les dos entrugues que'l primer ministru Alex Salmond quier faer a los escoceses en referéndum. El Partíu Nacional Escocés va faer campaña pol sí nes dos entregues
 
Con too, la formación d'Alex Salmond defende que'l so país yá dispón del so propiu Parllamentu y plenes competencies en materies como la educación, la sanidá y la vivienda. Poro, reclama'l drechu d'independizase del Reinu Xuníu pa esfrutar d'una meyor situación económica na actual crisis.
 
El borrador de la llei va tar en consulta pública hasta'l 30 d'abril, y nun se va llevar al Parllamentu pa la so votación hasta depués de les eleiciones britániques. Los ciudadanos escoceses pueden decidir nes próximes selmanes cómo quieren que seya la entruga del referéndum sobre l'ampliación de poderes, si quieren una ampliación máxima o más llindada.
 
El documentu presentáu esti xueves en Edimburgo preve qu'un referendu con un resultáu positivu sobre la independencia nun tendría un valor llegal nel Reinu Xuníu, sicasí, los nacionalistes esperen que dende Londres tengan en cuenta la opinión del pueblu escocés.
 
Cola mayoría de les encuestes indicando que los conservadores británicos podríen precisar apautar con dalgún otru partíu pa formar gobiernu, los nacionalistes escoceses y galeses podríen ser decisivos y esixir sofitu al referendu a cambéu d’apoyu al nuevu executivu del Reinu Xuníu.