Mediu rural punxo problemes al primer vinu etiquetáu n'asturianu
|
9 Xunu, 2010 por E.P. / Redacción
- Inicie sesión o rexístrese pa espublizar comentarios
Bodegas Oubanca apostó pol asturianu como dalgo novedoso nel etiquetáu del vinu y refugó la forma billingüe que-y esixó la Conseyería de Mediu Rural pa dar el preste a la iniciativa.
Asina lo esplicó en declaraciones a Europa Press David Marcos, viticultor y responsable d'esta firma familiar de vinos cangueses, que mañana xueves, día 10 de xunu, presentará en Cangas el nuevu productu. Trátase del Ḷḷumés nome col que se comercializará'l 'verdéu tintu', una "variedá desconocida, como la llingua asturiana que ye desconocida y naide apuesta por ella, menos nosotros", señaló.
La etiqueta va íntegramente n'asturianu de Cangas, y per detrás lleva la siguiente inscripción: 'Na noite de San Xuan, las ḷḷárimas d'un cangués fixeron que naciera este vino'. Trátase d'una dedicación "a una persona del conceyu qu'ama la llingua asturiana", y de quien nun quiso revelar el nome.
La idea surdió, según esplicó, porque "somos una bodega inquieta que siempre busca coses nueves y, amás, llevamos años detrás d'esti proyectu". Asina, esplicó que na nueche de San Xuan del añu pasáu foi cuando tomaron la decisión definitiva d'entamalu.
Refugó que l'etiquetáu n'asturianu puea ser una torga pa la comercialización. "La única torga", añadió, "foi la Conseyería, porque nun l'aprobaba en bable, quería que fuere billingüe". "Si pones la etiqueta billingüe va ser una llocura", consideró'l viticultor, qu'esplicó que decidió "sacalu n'asturianu total". "El vinu yá ta etiquetáu y mañana saldrá yá a la venta", confirmó.
Aseguró que la etiqueta ye "bien guapa" y qu'esti vinu ta "mui ricu", y animó a tola xente qu'ama la llingua asturiana, y tolos aficionaos e esta bebida en xeneral, a prebalo.
Efrén d'Andrés
Comentarios
La llingua y la tradicional viticultura canguesa xuníes. Una bon trabayu gracies al enfotu d'una empresa familiar. Norabona. A ver si hai manera d'enterase ú van comercializalo pa mercar unes botelluques. Y no que se refier a la Conseyería una amuesa de lo poco que-yos interesa qu'heba trabayu nesta tierra y eso en plena crisis. Ye más importante torgar la llingua. Impresentable, por nun emplegar pallabres más fuertes.
Lo más escandaloso ye qu'eso vien d'una de les conseyeríes d'IU, ta visto que tienen interiorizau el discursu del PSOE,¿onde ta Rafa que nun diz nada?,
Trai una caxa p'acá!!! Y que siga esi puxu de la xente de Cangas!!!
Por ciertu, hai daqué llagar (de sidre, of course) que tenga fechu cosa semeyante..?
Hai daqué llagar que tamién etiqueta n'asturianu, lo mesmo que la cerveza Belenos, que tamién etiqueta na nuesa llingua.
Respecto al vinu, etiquetar n'asturianu ye un rasgu diferenciador que dexuru supondrá un puxu a esta marca.
Espero verlo pronto en centros comerciales pa comprar una caxa.
Al final, dempués del continuau fracasu del actual individualismu y conformismu del modelu de valores, social y económicu actual, saldrá a la llluz que solo la unidá, la solidaridá y la identida de los pueblos supondrá un cambio a meyor na so economía, sociedad y emplegu. Nun nos llevemos a engaños, son 30 años fracasando nun modelu que ñegaba esa realidá.
Un saludu y muncho ánimu y éxitu, que seremos munchos los que os apoyemos.