Ḷḷumés, el vinu de los asturfalantes

Mañana xueves 10 a las 21 hores, va preséntase en Cangas el primer vinu del país etiquetáu íntegramente n'asturianu, 'Ḷḷumés', embotelláu pola empresa Bodegas Oubanca S.L.

Trátase d’una variedá única nomada verdéu tintu, que namás esiste nesti Conceyu. Van ser un total de 4.000 botelles y al ser un productu nuevu, la empresa nun sabe tovía onde les van comercializar. El vinu ta criáu en cepes centenaries y tuvo mientres nueve meses nuna barrica de carbayu francés.

Ye la primer vez que se va comercializar un vinu etiquetáu n’asturianu, amás va llevar el nome de Ḷḷumés, una parroquía de Cangas del Narcea. La empresa cuntó col sofitu de la Oficina de la Llingua del Conceyu y quieren dedicar esta bebida a tola xente qu’ama la llingua asturiana, n’especial a los cangueses.

Poro, l’etiquetáu va tar n’asturianu occidental, amás de reflexar dalgunos símbolos célticos.