Les Cortes soliciten a la Junta la declaración de BIC pal filandón

Los procuradores del PP y del PSOE nes Cortes de Castiella y Lleón dieron ayeri’l preste a la declaración de BIC pal Filandón, que podría aprobase definitivamente mientres 2010.

La iniciativa foi alcordada ayeri na Comisión de Cultura de les Cortes autonómiques, qu'encamienta a la Xunta de Castiella y Lleón a “empecipiar los estudios pertinentes cola fin d'establecer el nivel de proteición, incluyíu'l de Bien d'Interés Cultural, pa la tradición oral del filandón del Reinu de Lleón, tamién llamáu serano nes provincies de Zamora y Salamanca”. Una iniciativa semeyante nun fora aprobada’l pasáu 1 de febreru, cuando’l PP refugó una proposición non de llei del PSOE.

Agora, les Cortes de Valladolid van treslladar l'espediente al Conseyu Nacional de Patrimoniu Hestóricu, dependiente del Ministeriu de Cultura, pa entamar los trámites que conduzan a la reconocencia del filandón pola Unesco.

El procurador del PP por Lleón Javier García-Prieto dixo que’l PP nun s’opusó na anterior votación. Asina, esplicó que presentaran una enmienda p’afitar que la reconocencia de BIC ye un preséu más, yá que l'oxetivu final ye que'l filandón seya declaráu Patrimoniu Inmaterial de la Humanidá.

El voceru socialista, José Ignacio Martín Benito, impulsor de la propuesta, fixo mientres la so intervención un llamáu al consensu p’algamar alcuerdos. Asina, recordó que la sociedá lleonesa solicitó la declaración BIC d'esta tradición oral en numberoses ocasiones, mentando les declaraciones prevíes de la Diputación o'l porpiu Conceyu de Lleón.

Agora, l'aprobación definitiva del filandón como BIC depende de la voluntá política de la Xunta de Castiella y Lleón. Con too, una vegada abiertu l'espediente, l'aprobación definitiva nun tendría que retrasase acullá de 2010.