Uviéu acueye la II Sestaferia del profesoráu d'asturianu

El próximu vienres día 4 de xunu va tener llugar, nes instalaciones del Centru de Profesores y Recursos d'Uviéu, la II Sestaferia del profesoráu d'asturianu. Una actividá abierta a los docentes de Llingua Asturiana de toles estayes educatives que quier valir de puntu d'alcuentru d'esperiencies y conocimientos al rodiu de l'asignatura.

Esti añu'l noyu temáticu asítiase al rodiu de la Competencia Llingüística y l'aplicación de les Nueves Tecnoloxíes nes clases d'asturianu. D'esta miente les ponencies y talleres programaos van tar orientaos hacia la contribución de l'asignatura nel desarrollu de la espresión oral y escrita del alumnáu, yá seya al traviés de los medios tradicionales o los más novedosos.
La Sestaferia entamará cola ponencia de l'académica y profesora Marta Mori d'Arriba, "Contribución de l'asignatura de Llingua Asturiana a la competencia en Comunicación Llingüística", pa siguir con dellos talleres simultáneos que tratarán el tratamientu concretu de la espresión oral y escrita nel aula.
Otra manera na xornada de la tarde va dase pasu a les Nueves Tecnoloxíes encabezaes pola ponencia de Xandru Martino Ruz "Aplicación de les Nueves Tecnoloxíes nes clases de Llingua Asturiana". Darréu tendrán llugar otra riestra de talleres simultáneos venceyaos col usu de recursos dixitales en Rede como los blogues, la prensa dixital, la radio o la pizarra dixital.
 
Información y matrícula na Páxina del CPR d'Uviéu.