Materiales pa trabayar na Selmana de les Lletres

Un añu más la Conseyería d'Educación espubliza los materiales didácticos de la Selmana de les Lletres Asturianes, empobinaos a los escolinos y escolines de Llingua Asturiana nes sos diferentes estayes, teniendo toos ellos esti añu como noyu temáticu la Diversidá Biolóxica.

Asina na Educación Primaria trátase esti tema dende l’ámbitu asturianu, proponiendo un total de tres blogues educativos que van de lo particular a lo xeneral: el tratamientu del mou de vida d'un animal protexíu como ye l'osu pardu cantábricu nel Primer Ciclu, la investigación acerca de les especies protexíes d'Asturies nel Segundu Ciclu y los ecosistemes complexos que conformen los espacios protexíos asturianos nel Tercer Ciclu de Primaria.
Otra manera na Educación Primaria apúrrense, en formatu PDF, una trentena d’actividaes interdisciplinaries con solución en diccionarios, mapes o páxines web. Les actividaes tán pensaes pa que per unos díes del mes de mayu, nos institutos asturianos, se trabaye y s’enrede col léxicu, la xeografía, la naturaleza o los númberos.