Contrarios a la incineradora manifiéstense frente al Parllamentu

|

El consorciu cívicu concentróse na Xunta Xeneral pa entregar a los grupos parllamentarios del manifiestu contra la incineradora y a favor de l'alternativa pol reciclaxe y compostaxe.

El direutor de l'Axencia Asturiana de Cooperación al Desarrollu, Rafael Palacios, pidió güei n'Uviéu mientres la concentración, que "el que quieran la enfermedá y la ruina económica p'Asturies", que según él va carretar la planta, "deféndanlo en campaña electoral".

Asina manifestó Palacios el so refugu a la construcción de la incineradora, que la Xunta de Gobiernu de Coxersa va decidir güei, y contra la que se manifestaron Cavastur, l'Asociación en Defensa de la Sanida Pública, Ecoloxistes n'Acción, la Unión de Consumidores d'Asturies (UCE), Greenpeace- España, y Comisiones Obreres (CCOO).
  
Amás, el direutor de l'Axencia Asturiana de Cooperación al Desarrollu, anunció la puesta en marcha d'una cadena de movilizaciones que llueu se desarrollará col fin de desarticular "un proyectu que surde como frutu d'un pactu vergonzosu ente PSOE y PP", según indicó.
  
Lo mesmo apuntó'l presidente de la Unión de Consumidores d'Asturies (UCE), Dacio Alonso, que defendió l'alternativa que propón el consorciu y llamó a los ciudadanos a la movilización. "El 90 por cientu de los asturianos esixe al so Conceyu reciclar", recordó aludiendo a un estudiu realizáu recientemente por UCE. Por ello, les próximes midíes del consorciu cívicu van centrase en "acudir a los Conceyos y enfrentar al plenu municipal colos ciudadanos".
  
Coles mesmes, Alonso aseguró que se va estudiar dende'l puntu de vista xurídicu la postura de los Conceyos, puesto que "nun pue ser que na Xunta de Coxersa se vote a favor de la incineración si nun vien apoyáu pol plenu municipal", según dixo.
  
Pela so parte, el conceyal d'Izquierda Unida nel Conceyu de Corvera, Enrique Bonu, destacó la posición "clara y nítida" que caltién el so partíu al respecto de la planta incineradora, y que va defender güei na Xunta del Coxersa. "La incineración nun ye'l camín, el camín ye'l reciclaxe, que xenera más emplegu y ye lo más intelixente", argumentó.
  
Mercedes Cruzado (COAG) acudió a la concentración en representación de los ganaderos, "unos de los grandes afectaos", nes sos propies palabres. Cruzado alvirtió que'l radio d'acción de la incineradora va afectar a unes 70 esplotaciones ganaderes que van tener que cesar na so actividá si na lleche o na carne se detecten restos de dioxines.
  
Tamién asistió a la protesta'l voceru d'Asamblea de Ciudadanos pola Izquierda (Asciz), Roberto Sánchez Ramos, que xustificó la so presencia como un apoyu al futuru y una apuesta pol reciclaxe". "Estráñame qu'un gobiernu socialista apoye una política regresiva como ésta, más propia de la derecha", añadió Sánchez Ramos, que ve peligrar el pactu de gobiernu ente PSOE y IU. "Si nun gobiernu formáu por dos partes una d'elles incumple la so palabra, la otra tien que salir y ponese del llau de los ciudadanos", acabó.
 
Vigón cuenta qu'haya un plan de viabilidá

El presidente de la Federación Asturiana d'Empresarios (FADE), Severino García Vigón, dixo güei que confía en que los responsables del proyeutu pa construir una planta incineradora cuenten col correspondiente plan de viabilidá pa la inversión prevista, valorada nunos 250 millones d'euros. "Confío en que lo tuvieren bien en cuenta, según los recursos pa facer frente", señaló.
  
Nuna rueda de prensa ofrecida n'Uviéu, y a preguntes de los periodistes, Vigón nun quiso afondar más porque, según esplicó, nun disponía de datos pa poder falar con propiedá de los costos de la incineradora. "Que tomaron la decisión de construyila baxo criterios técnicos merécenme tolos respetos", dixo.
  
Güei reúnese la Xunta de Gobiernu del Consorciu pa la Xestión de Residuos Sólidos d'Asturies (Coxersa) nel salón de sesiones del Consorciu en La Zoreda (Serín, Xixón) p'aprobar l'entamu de los trámites pa la construcción de la planta, asina como la so financiación.

Comentarios

Faltaba muncha xente. El 6 de xuno hai convocada una manifestación.  Esi día ye domengu, nun hai disculpa.

Contador Estadistiques