Morán: “Asturies lleva munchísimos años sufriendo un procesu d’aculturización y neutralización de la so identidá"

El branu pasáu empezó a echar a andar la Lliga Celta d’Asturies, organización que nesti tiempu entamó delles conferencies y una visita guiada a un castru. Asturies.com faló col so presidente, Fernán Morán Suari (Uviéu, 1971), sobre’l celtismu, los oxetivos del coleutivu y el procesu d'aculturización que vive'l nuesu país.

¿Con qué enfotu naz la Lliga Celta d'Asturies?

Fundamentalmente l’enfotu principal de la Lliga Celta d’Asturies yé promover l’amor pola cultura ya identidá de nueso. Dímonos cunta que cuando-y averes la so cultura a la xente asturiano recíbela con gustu, con gratitú y, sobro too, la xente respuende, presta-y, siéntela de so. Pero ta nidio qu’esti nun ye un procesu a finar en 5 años. Asturies lleva munchísmos años sufriendo un procesu d’aculturización y neutralización de la so identidá a tolos niveles. Que la xente torne a valorizar les sos costumes y tradiciones, les conozca y les sienta como suyes, que son parte de la so identidá... Eso ye una xera difícil que lleva tiempu y munchu trabayu per delantre. ¡Tamos nello!

Per otru lláu, tamién trabayamos n’afitar el sitiu que-y cuerresponde a la nación celta astur na comuña céltica europea, sobro too nel Arcu Atlánticu. Per último, pero non menos importante, trabayamos tamién pola defensa y caltenimientu del nuesu padremoñu hestóricu-cultural ya los Drechos Humanos n’Asturies, sobre manera los llingüísticos. L’asturianu ya va cuantayá que tenía que ser una llingua cooficial n’Asturies.

¿Esiste una conciencia céltica na población asturiana?

Yo entiendo que sí, pero creo qu’entovía hai muncha xera que facer. Sobro’l celtismu hai munches idegues equivocaes y un ‘mieu’ mui grande a falar abiertamente d’ello, sobro too a nivel alministrativu o académicu. Nun soi entender el porqué d’esi tabú, pero ehí tá; y non soi yo l’unicu que lo sabe y nota.

Ye, cuando menos ablucante, que lo que nuna nación vecina comu Breizh o Cymru un elementu arqueolóxicu mui asemeyáu ya de la mesma época ye celta ya n’Asturies ye castreño… Yo entrúgome una cosa: si toles naciones celtes de l’Arcu Atlánticu vivíen en castros a lo llargo de la protohestoria y parte de l’Edá Antigua, esáutamente igual que n’Asturies, ¿por qué namái esiste la ‘cultura castreña’ n’Asturies o Galicia? Quiciabes nun teo los conocimientos académicos que tienen munchos y munches de los académicos o arqueólogos asturianos, pero soi bastante llistu como pa saber que cuando tengo delantre una botella con un llíquidu blancu dientro ye llechi, sobro too cuandu toi dientru d’una corte arrodiáu de vaques llecheres y hai un paisanu o paisana ordeñando…

¿La organización tien que ver con otra de nome similar que furruló nel pasáu?

Bono comu too’l mundiu sabe, na década de los 80 a los 90 xurdió la primer Lliga Celta d’Asturies con xente estraordinaria’l frente trabayando mui duru y mui bien tantu a nivel nacional comu internacional. Llamentablemente esa organización dexo d’esistir nel añu 1990, si nun m’equivoco.

La Lliga Celta d’Asturies d’anguaño ta veceyada cola de los 80 en dalgunos sentíos. Obviamente los oxetivos son perasemeyaos, pero nun hai rellación direuta cola otra, anque tengo que dicir que na nueso primer actividá, una conferencia en Xixón titulada ‘El Díi de Difuntos na tradición asturiano’, qu’impartió maxistralmente Bertu Peña, tuvi’l gustu de conocer a ún de los antiguos miembros de la Lliga Celta d’Asturies d’aquella dómina, al que comu nun podía ser d’otru xeitu convidélu a participar del proyeutu. Él declinólo por razones personales.

La Lliga Celta d’Asturies d’anguaño tien parte del espíritu de la otra, pero ye un proyeutu nuevu que, pel momento, va desencolcándose con bona marcha. La xente ta respondiendo bastante bien a les aiciones que vamos faciendo. Tamos nun intre de dir faciendo coses ya la mesma vegada dir deprendiendo y conociendo xente pa nun mediu plazu dir faciendo proyeutos más ambiciosos.

¿Cómo dieron los primeros pasos?

Bono, dempués de contautar con varies persones qu’amosaron tar interesaes realmente en facer el proyeutu, entamamos aconceyando pa dir aldericando cómo diba ser la estructura, fines y oxetivos de la Lliga Celta d’Asturies. Esti procesu duró al rodiu d’un añu aproximao. Nesi intre fuimos redautando los estatutos llegales, buscando la sede social…, matizando les coses. Por cierto tuvimos munchísimos problemes pa presentar cualquier tipu de documentu nel Rexistru de la Conseyería de Facienda n’asturianu: teníes que llevar copia n’español, facer declaraciones xuraes de lo que ponía n’asturianu… Una llaceria realmente vergoñosa. Asturies yé l’únicu país nel qu’un asturianu falando na so llingua siéntese foriatu…

Ye n’agostu l’añu pasáu cuandu recibimos la resolución de la conseyería pola que quedábemos constituyíos comu una organización non gubernamental llegalizada.

¿Quién conforma la Lliga Celta d'Asturies?

La estructura ye percenciella: la que marca la Llei 1/2002, de 22 de marzu, reguladora’l Drechu d’Asociación. La Xunta Direutiva ta compuesta por cuatro persones: Rubén Dinten, que ye’l tesoreru; Vítor González, secretariu; Sonia D. Suárez, vocal; y yo, Fernán Morán, que soi’l presidente.

Cualquier persona mayor d’edá pue ser sociu y socia de la Lliga Celta d’Asturies, namái hai que cubrir una solicitú, unviala a la Xunta Direutiva y, una vegada ésta lo apruebe, yá se pasa a ser miembru de l’asociación. La cuota d’inscripción ye de 10 euros y llueu se paga una cuota mensual de 3 euros mensuales.

El tema económicu nun tien por qué ser razón pa desaniciase si hai daquién que quiera entrar na organización. Les persones qu’acrediten tar desemplegaes, con ingresos de subsistencia o ensin ingresos puen solicitar una esención temporal del pagu de la cuota de sociu hasta que les coses ameyoren.

Nesti tiempu entamaron delles charres y una visita a un castru.

Dende’l ‘ñacimientu’ de la Lliga Celta d’Asturies entamamos a trabayar en trés estayes fundamentalmente. La primera ye l’espardimientu de la cultura ya identidá asturiana. Pa eso organizamos conferencies, visites guiaes, alderiques y creamos un blogue onde espublizamos artículos regularmente venceyaos a los nueso oxetivos, amás d’una páxina de Facebook y una cuenta de Twitter.

Llueu entamamos en dalgunos casos, y caltenemos n’otros, contautos con organizaciones y persones d’otres naciones celtes del Arcu Atlánticu. Por último, pretendemos crear un fondu documental temáticu y, tresversalmente a too esto, dar a conocer la nuesa organización y los nuesos oxetivos.

¿Qué planes tienen pa los meses próximos?

Hasta finales d’esti añu siguiremos desencolcandu’l Programa d’Actividáes aprobáu nel últimu conceyu anual que tuvimos en xineru que básicamente ye lo que conté enantes: conferencies, visites guiaes, espublizaciones nel blogue y contautos con otres organizaciones de les otres naciones celtes.

A mediu plazu, una vegada afitaos, con más esperiencia, más contautos y meyores recursos económicos, tenemos pensao facer proyeutos más ambiciosos, pero preferimos dir pasu a pasu y nun vender la piel del bardión enantes de matalu.

Fala de contautos con otres organizaciones d’otres naciones celtes. ¿Cuáles destacaría?

Nesta estaya tamos trabayando agora y caltenemos conversaciones con organizaciones y persones d’otres naciones celtes, sobro too con Kernow, Breizh, Galiza, Cantabria, Cymru, Éire, País Llionés, Norte…

¿Qué visión hai d'Asturies nestos países hermanos?

Depende. Ye mui distinta la visión que tienen les persones de la cai –con esceiciones– que les que tienen les rames de la Lliga Celta Internacional. La xente normal, sobro too la bretona, cornuallesa ya irlandesa ven a Asturies como una nación céltica en bona midía, sobro too cuando-yos amueses información al respeuto.

A nivel d’organizaciones, como la International Celtic League, ye lo de siempres: como nun fales una llingua celta, nun yes una nación celta. Ye dalgu paradóxico porque nin ellos les falen en realidá y la inmensa mayoría de la so nación tampoco, pero ye lo qu’hai. Esta organización ye puramente llingüística y anque reconoz el raigañu célticu d’Asturies ya’l so enfotu por caltener la so cultura céltica, nun falamos celta.

Sicasí, Asturies, igual que les otres naciones del noroeste d’Iberia nun necesiten l’aprobación de nenguna asociación foriata pa ser lo que son: naciones celtes de plenu drechu.

Llueu ta l’inestimable llabor que fizo y fai Lisardo Lombardía como direutor del Festival Intercélticu d’An Oriant, que pue dicise que punxo a Asturies nel mapa célticu internacional, y la d’otros festivales qu’ayudaron a espardir la nuesa cultura, como’l Festival Intercéticu d’Avilés, el Festival Intercéltico de Tapia, la Nueche Celta de Porcía, el Festival Sol Celta y tantos otros. Yo personalmente echo muncho de menos la esistencia d’un Festival Celta Internacional d’Asturies, pero ye una opinión personal namái.

Creo que, añu tres añu, Asturies va amalgando’l so sitiu na comuña céltica internacional; y bien afitáu. Pero como too, pa estes coses fai falta sofitu de les alministraciones y sofitu económicu…

¿Ha de mirar Asturies más hacia l'Atlánticu?

Por supuesto. Asturies ye una nación celtoatlántica y la so cultura ye la del mar Celta ya los sos vecinos. La nuesa orografía, fauna, flora, gastronomía, folclor, mitoloxía, arquitectura…, too ye atlántica. Ún de los problemas d’aculturización que sufre Asturies ye la ‘mediterranización’ que tenemos que sufrir añu tres añu anque teamos a 1.000 quilómetros del Mediterraneu.

Nun podemos escaecer que’l Noroeste d’Iberia tamién yé perimportante dende’l puntu de vista de la comuña céltica del Arcu Atlánticu. Nesta fastera hai cinco naciones celtes: Cantabria (cántabros), Asturies ya’l País Lliones (astures tresmontanos y cismontanos), y tamién Galiza y Norte (Galaicos). Sedría mui interesante qu’estes cinco naciones celtes del noroeste ibéricu que caltienen una cultura perasemeyada, unes llingües mui asemeyaes –toes son derivaes del romance ibéricu–, una hestoria similar, una mitoloxía prácticamente igual, un folclor casi idénticu… En fín, sedría bono o meyor dicho, mui bono, qu’entamáramos a organizanos nuna plataforma que sirviera pa definder los intereses culturales y llingüísticos de nueso col envís de caltener la nuesa cultura, identidá y mou de vida.

¿Cómo traten esti asuntu les alministraciones?

Yo creo que debía de sofitase muncho más… Por exemplo, ¿cuántos castros escavaos hai en Galiza y cuántos n’Asturies? ¿Cuánta xente sabe que namái nel Naranco hai al rodiu d’ocho castros ensin escavar pa los que naide mira? Y nun falo de los que tán esbarrumbando comu’l Castru Podes en Gozón ¿Qué subvención tien el rexonéu andaluz o les Feries d’Abril en Xixón o L’Infiestu y que sofitu tien los Astures escontra Romanos de Carabanzo en Ḷḷena? ¿Cuántu enfotu hai realmente n’Alministración en que los críos y críes deprendan la so cultura y tradiciones rialmente? Y nun voi falar del nuesu idioma porque yá sedría pa echanos a llorar.

¿Ye imporante afondar nel nuesu pasáu célticu dende la escuela?

Pa mio idega nun ye tan ‘pasáu’. Paez que tool mundiu s’enfota en pensar que namái ye celta la Edá del Fierro y na mio opinión nun ye asina. Ye induldable qu’a lo llargo de la historia Asturies tuvo influencies d’otres cultures: romanes, xermániques, castellanes, etc. Pero cuando ún ponse un poco a ver qué hai na mitoloxía, les tradiciones, la música y dances tradicionales, l’arqueoloxía, l’artesanía popular, etc., dase cuenta que dientro de que somos homes y muyeres del sieglu XXI, sigue calteniéndose un raigón perimportante célticu en tola cultura de nueso. Eso, por dalguna razón qu’esbarrunto, pero que quiciabes nun ye’l momentu d’esponer, ocúltase a nivel académicu, yá non sólo nes escueles, sinón tamién nos institutos y, sobro too, y pa min lo peor, na universidá.

¿Cómu debería ser? ¿Cómu igualo?... Ye la entruga’l millón. Yo, al traviés de la Lliga Celta d’Asturies apurrirél mio granu sable pa dir camudando les coses. Pero pa, que sirva d’exemplu, na Sorbona hai un departamento sobre la cultura celta; en Cardiff tamién; y n’Oxford, Cambridge, nel Trinity College… Hai munches universidaes nel mundiu, non sólo n’Europa, qu’estudien la so cultura con oxetividá y métodos científicos y nun pasa nada… ¿Tamién sedremos diferentes neso?