Guardado: "Facemos un llamáu a tol mundu pa que venga a la ‘Entaína’ y a pasar con nós el Día de la Reciella"

El domingu ye un día mui esperáu por munchos neños y neñes, asina como polo sos familiares. Celébrase’l Día de la Reciella y, con él, la primer carrera familiar pol asturianu ‘Entaína’. David Guardado (Xixón, 1970), miembru de ‘Reciella. Families pol Asturianu’, adelanta qué vamos poder disfrutar nesta folixa nel Muséu del Pueblu d'Asturies.

El Día de la Reciella yá ye una xornada consolidada, sumando con ésta cuatro ediciones.

Sí, entamemos en 2013 y ye un día yá afitáu. La idea yera facer un día nel que les families pudieren tener a la so disposición actividaes n’asturianu. Esto ye daqué que les llingües non subordinaes tienen tolos díes. Nós tenemos que dir creando los espacios de normalidá, y facer por dir enanchándolos. La cosa va medrando pasu ente pasu, como toles coses que facemos en Reciella. Esti añu, hai más de 20 entidaes que collaboren na organización de forma desinteresada a les que-yos agradecemos enforma la so collaboración, sobre manera a la Conceyalía de Cultura y a la Oficina de Normalización Llingüística de Xixón, que lleven sofitándonos dende’l primer añu.

¿Por qué escoyeron el Muséu del Pueblu d'Asturies pa esta celebración?

Ye un sitiu mui afayadizu y guapu, y amás loxísticamente’l Tendayu ye una estructura que da munchu xuegu. Dende’l Muséu siempre nos dieron toles facilidaes y eso tamién ayuda a que seya un sitiu nel que teamos mui a gustu y repitamos. 

Esti añu va contar con una gran novedá: la primer carrera familiar pol asturianu 'Entaína'.

Ye otru pasín na ufierta d’actividaes y esti añu, al ser el primeru, plantegámosla con muncha prudencia a ver si la xente respuende y podemos caltenela otros años. La verdá ye que dende’l Patronatu Deportivu Municipal de Xixón echáronnos un gabitu imprescindible na organización. 

¿Qué pretenden con esta iniciativa?

Visibilizar nun entornu festivu y venceyándola a toles actividaes de la vida diaria, nesti casu’l deporte, la necesidá de la tresmisión xeneracional d’una llingua pa qu’un idioma sobreviva. D’ehí que falemos de garrar el testigu. En concreto na carrera del domingu va haber una familia que se va dir pasando lliteralmente’l testigu ente miembros de delles xeneraciones. La carrera ta plantegada como una actividá non competitiva; nun va haber clasificaciones, pero sí premios pa tola xente que participe, sobre manera pa lo más pequeño. Y amás tenemos patrocinadores como Fuensanta o Clas que nos apurren avituallamientu; agua y productos llacteos. 

¿Pueden participar namái families o tamién grupos d’amigos o persones individuales?

Pue participar tol mundu. El percorríu va ser namás d’un kilómetru, mui cenciellu y pa que pueda facelu tola xente que-y apeteza anque un tea de facer deporte. Ye más, ye importante que vaya xente pa sofitar l’actividá. Asina que facemos un llamáu a tol mundu pa que venga a la Entaína y a pasar el día con nós en Día de la Reciella, tenga o nun tenga neños y neñes. Ye un día pa que toos y toes celebremos, espardamos y garremos conciencia de la importancia de la tresmisión xeneracional. 

La xente interesao en correr, ¿ónde pue inscribise?

Hai un formulariu online nel que se pueden facer les inscripciones. 

¿Qué otres actividaes tán previstes pa esti día?

Dende les 11 de la mañana hai munches actividaes que nun paren en tol día: cuentacuentos con Olga Cuervo y el llibru Salamandán. Islla de lleendes, talleres de gastronomía y d’ecoloxía con Miel et Canelle y Apasos, un taller de reclicaxe qu’organiza Emulsa, pintacares, un partíu de fútbol cola collaboración del U.C. Ceares, xuegos tradicionales con El Garrapiellu, un photocall con Moyando’l Culu de Ruma Barbero, esposiciones… Tamién vamos tener un chigre pa que la xente pueda tomar daqué y quedar a xintar y un espaciu pa bebés, pa  que los ñácaros puedan tar nun sitiu afayadizu.

La música tamién ye protagonista. ¿Qué actuaciones habrá?

Vamos tener con nós a El Trubiecu, la Banda de Gaites infantil de Villaviciosa, y tamién una escoyeta del discu Bestiariu, con delles sorpreses tamién, pa zarrar el día.

 Esti añu destaca la grabación d'un cantar de Skama la Rede n'esclusiva pa l'actividá 'Entaína'.

Sí, Skama la Rede fixéronnos un tema específicu mui prestosu. La idea surdió como una forma de promocionar el día, y tamién val como material didáctico. La verdá ye que quedó-yos perbién y la xente que lu sintió nun ye a parar de cantalu. Y amás tenemos un vídeo del cantar fechu por Pablo Quiroga d’Algamar, que ta mui prestosu tamién.

 Amás son munches les actividaes qu'entamen a lo llargo del añu, ente les que destaca 'La Escolina de Reciella'

Sí, facemos actividaes de tipu más internu a lo llargo del añu. Ente les actividaes abiertes amás del Día de la Reciella rescamplen Escenines, el festival d’artes escéniques n’asturianu que tamién vamos facer a final d’añu y la Escolina, qu’entamará n’ochobre un cursu nuevu en candás y Xixón, y cola que esperamos, esti añu sí, echar a andar n’Uviéu.

Reciella lleva yá dellos años funcionando p'ayudar a caltener la tresmisión xeneracional del idioma. Echando una vista atrás, ¿cómo valora los resultaos algamaos nesti tiempu?

En realidá Reciella ye namás una gotina d’agua nel procesu de recuperación llingüística. Fai falta muncha organización, compromisu y esfuerzu, y un cambiu social pergrande pa voltiar el procesu de sustitución llingüística. Y con tola modestia del mundu, pa eso trabayamos dientro de les nuestres posibilidaes y entamando dende abaxo, dende les nuestres cases. Pero nun podemos engañanos: los contestos de tresmisión llingüística estable del asturianu fuera del ámbitu familiar pue dicise que yá nun existen n’Asturies, polo menos en llugares como Uviéu, Xixón o Avilés que concrentren lo más de la población asturiano. Por eso hai que dir reconstruyéndolos.

 ¿Y a qué-y paez que se debe esa situación depués d’años de política llingüística?

A que l’asturianu ye una llingua ensin prestixu, anque duela dicilo, y refugada poles élites que marquen les axendes culturales y polítiques. Tovía la xente pue facer chancia col asturianu y nun pasa nada, porque, anque dacuando pensemos otro, nun llegamos nin a que  nun sea políticamente correcto defender la llingua asturiana. Por eso,  hasta nes families nes qu’existe una voluntá espresa de tresmitir l’asturianu faise mui difícil facelo porque los neños y les neñes falen como los sos iguales, y casi tolo que sienten los nuestros fíos y fíes ye castellanu. La sociedá asturiana ta organizada de forma que nun hai estímulos pa facer vida n’asturianu; nun hai televisión n’asturianu y na escuela l’asturianu ye una asignatura “maría”, cuestionada, maltratada y que s’enseña en precario y como una llingua estranxera. Ye falso qu’exista un procesu de normalización promovíu pola Alministración. Nunca lu hubo.

¿Son entós pesimistes col futuru del asturianu?

Non, non, tolo contrario. Somos optimistes y realistes. Esa situación tan mala ye la que fai necesaries iniciatives como Reciella y munches otres, sobre manera si reparamos en que la tresmisión interxeneracional, que ye la base de cualquier procesu de recuperación llingüística nun se trabayó muncho hasta agora de forma específica. Y nós somos optimistes, porque’l futuru va depender de lo que nós faigamos, tamién porque toles coses que facemos tienen mui bona respuesta dende tolos sectores sociales a los que llegamos y vemos que la xente asturiano aprecia y quier mayoritariamente caltener la so llingua, y porque nun hai nada más prestoso y gratificante que trabayar con neños y neñes dando-yos ferramientes pa qu’ellos seyan los que moldeen el futuru de la nuestra cultura.