Convocatories

Dende'l día 10 hoi hasta'l 14 ta abierta una esposición nel Palaciu de Valdecarzana coles mascotines ganadores nel VI Concursu de Mascotines de les VII Xuntes d'Escolines y Escolinos y con tolos dibuxos que participaron, magar que nun algamaren premiu. Depués nel primer pisu, ta puesta la esposición de les ilustraciones del llibru de Berta Piñán 'Arroz, agua y maíz', llibru ganador del primer premiu del Certame de Lliteratura Infantil y xuvenil María Xosefa Canellada, que convoca la Conseyería de Cultura.

Con motivu de la Selmana de les Lletres Asturianes, l'Ayuntamientu de Colunga, al travies del Serviciu de Normalización Llingüistica de la Comarca de la Sidra, organiza un alcuentru cinematográficu con Pablo A. Quiroga Prendes.

Proyeutaranse cuatro curtiumetraxes ('Bisarmes', 'Aida', 'El año de los tres ochos' y 'Tres versiones') y habrá una charra-alderique col direutor. La cita ye'l sábadu 8 de mayu, a les 20.30 hores na Sala Loreto de Colunga.

La Timba Poétika llega a la so quinta edición n'Uviéu. Nesta ocasión la cita va ser a  les día de les lletres asturianes y aprovechando la fecha, la timba va tar dedicada a la lliteratura fecha n'asturianu.

Van ser 7 los poetes  participantes: Miguel Allende, Laura Marcos, Pablo Texón, Sergio Gutiérrez Camblor, Xandru Fernández, Dani Tritón y Pablo X. Suárez.

Esti viernes, de magar les 19h, La Coḷḷá Propinde tará tocando en Xixón na xornada de pieslle de les XV Xornaes de Llingua y Cultura, nel salón d'actos del Ateneu de la Calzada.

La Coḷḷá Propinde, presentará así per primera vegada en Xixón, los temes del so tercer trabayu discográficu, "A Teyavana", publicau esti mesmu añu col sellu Algamar Producciones.