Falar d'Asturies.com ye falar de la historia recién de la llucha pola supervivencia de la nuestra llingua. Nació cuando los tiempos comunicativos taben cambiando, cuando a la Xunta pola Defensa de la Lllingua llegó mocedá que pensaba d'otra manera cómo rellacionase cola xente, cómo face-yos llegar el nuestru mensaxe reivindicativu.
Pasemos d'andar de periódicu en periódicu coles fotocopies de los nuestros comunicaos a manexar el corréu electrónicu, d'echar mano del teléfonu p'avisanos a crear grupos de corréu pa coordinanos, de saber les últimes novedaes nos espacios informales d'ociu a usar los foros d'internet. Y de toos esos cambeos foi testigu privilexáu Asturies.com.
Quien repase los nuestros cartelos del Conciertu pola Oficialidá va ver naquellos años el so logotipu, como sofitu imprescindible pa danos una voz que los grandes medios de comunicación siempre nos negaron. Recordar les nuestres manifestaciones ye recordar les sos galeríes de semeyes al otru día. Nos archivos d'esti mediu va poder atopase tola nuestra actividá, tolos nuestros comunicaos, la historia viva de la reivindicación llingüística. Siempre tuvieron ehí, acompañándonos na nuestra llucha y informando nel nuestru idioma. Namás queda dar les gracies a Asturies.com y felicitala por estos 25 años de trabayu. Esperamos que nun nos aproveza muncho lo que queda de camín pa llograr lo que tamos buscando: la normalidá llingüística n'Asturies. De xuru qu'Asturies.com va tar ehí pa cuntánoslo.
Xosé Candel
Voceru de la Xunta pola Defensa de la Llingua Asturiana
