Bilordios Filolóxicos, por Ramón d'Andrés

Asemeyances engañoses (y II) (16/12/02)

Esisten palabres que, pola so asemeyanza ente elles, puen provocar tracamundiu a les persones que tán deprendiendo la nuestra llingua. Rematamos esta selmana la llista de les más corrientes.

Munchos verbos amuesen formes equivalentes con A- inicial o ensin ella (topar y atopar, columbrar y acolumbrar), pero n'otros casos da llugar a palabres de significáu diferente, que convién estremar:

Basar 'fundamentar, poner base', abasar 'arrastriar'.

Coyer 'garrar, pañar', acoyer 'recibir con procuru'.

Facer 'crear, realizar', afacer 'asegurar bien con una cuerda, afayase a gustu'.

Falar 'comunicase col llinguaxe', afalar 'aguiyar, dar ánimu'.

Fiar 'dar confianza, vender daqué pa cobralo n'otru momentu', afiar 'convertir a daquién en fíu, afiyar'.

Filar 'facer filo, convertir en filo', afilar 'aguzar, dar corte a una ferramienta'.

Fumar 'aspirar fumu de tabacu o d'herbes', afumar 'enllenar o cubrir de fumu'.

Güeyar 'mirar, echar una güeyada', agüeyar 'echar el mal de güeyu'.

Llanzar 'tirar, aventar', allanzar 'retrasar nel tiempu'.

Llargar 'echar l'apareyu, colar d'un sitiu', allargar 'volver o volverse llargu'.

Llegar 'apaecer nun sitiu al que se camina', allegar 'averar daqué, presentar allegaciones'.

Llegrar 'trabayar cola llegra', allegrar 'poner o ponerse allegre'.

Lluchar 'engarrase, combatir', alluchar 'prestar, gustar'.

Matar 'quitar la vida', amatar 'apagar un fueu, una lluz'.

Meter 'poner daqué dientro d'otro', ameter 'aumentar, amestar'.

Paecer 'tener apariencia', apaecer 'ponese a la vista'.

Pagar 'dar dineru al mercar daqué', apagar 'facer que dexe d'arder un fueu o una lluz'.

Tayar 'cortar', atayar 'dir per un atayu, dir al alcuentru de daquién'.

Techar 'poner techu', atechar 'guarecer de la lluvia'.

Xelar 'volver o volvese xelu', axelar 'llimpiar el granu del cereal, voltiar los güevos la pita'.

Per otru llau, magar que la presencia o ausencia d'una "yod epentética" (una "i" que fai diptongu cola vocal siguiente) ye davezu indiferente pa col significáu, n'otres ocasiones sí produz diferencies:

Afamáu 'que tien fama, que ye conocíu', afamiáu 'que tien fame'.

Capar 'dexar ensin muérganos reproductores', capiar 'llamar a daquién con un xestu de la mano'.

Corar 'matar con un cuchiellu en corazón o en pescuezu', coriar 'cantar a coru'.

Curar 'sanar, guarir d'una malura', curiar 'tratar con procuru, con cuidáu'.

Fumar 'aspirar fumu de tabacu o d'herbes', fumiar 'echar fumu'.

Golar 'allampiar, naguar, pasar ganes de daqué', goliar 'meter goles'.

Mirar 'güeyar, echar la vista a daqué', miriar 'moscar o sestiar les vaques'.

Pasar 'dir per un sitiu', pasiar 'caminar con aposientu per un sitiu'.

Salar 'echar sal, volver o volvese saláu', saliar 'dar una vuelta en barca'.

Serrar 'cortar con una sierra', serriar 'alendar con dificultá'.

Tornar 'volver, esviar, protexer', torniar 'trabayar con un tornu'.

D'otra manera, hai palabres que s'estremen, na pronunciación y na escritura, por llevar "LL" o "Y". Dellos exemplos:

Esfollar 'espelleyar', esfoyar 'quitar les fueyes'.

Bollu 'pieza de pan, riche', boyu 'espluma de los líquidos'.

Gallu 'machu de la pita', gayu 'caña arrincada d'un árbol'.

Ralla 'aperiu pa llimpiar la corte, la masera', raya 'llinia o trazu al dibuxar'.

Rallu 'un páxaru', rayu 'de les ruedes, de la truena'.

Salla 'acción de sallar', saya 'prenda de muyer'.

En fin, hai palabres que s'estremen namái por escribise una con "B" y otra con "V", correspondiéndo-yos la mesma pronunciación. Equí van dellos exemplos:

Aprobecer o probecer 'volver o volverse probe', aprovecer o provecer 'facese llarga la espera'.

Bañu 'acción de bañase, sitiu pa bañase', vañu 'aperiu p'aventar el granu'.

Basa 'sedimentu de puertos o ríes', vasa 'conxuntu de vasos y platos'.

Beta 'lletra griega', veta 'capa de mineral, tira'.

Bezu 'llabiu inferior d'un animal', vezu 'costume'.

Bien 'alverbiu de mou', vien 'del verbu venir'.

Bocal 'boca d'una botella o d'un pozu', vocal 'soníu de la llingua'.

Botar 'echar', votar 'dar el votu'.

Buelu 'güelu', vuelu 'acción de volar'.

Esbariar 'resbariar, esboligar', esvariar 'alloquecer'.

Nabal 'sitiu plantáu de nabos', naval 'de les naves, de los barcos'.