Espaciu y Tiempu de la Llingua Asturiana

Bilordios Filolóxicos, por Ramón d'Andrés

La función del neutru (14/04/03)

N'asturianu l'axetivu y el pronome tienen masculín, femenín y neutru, que son a manifestase en tres terminaciones estremaes, como en malu (masculín), mala (femenín) y malo (neutru). El neutru tien delles misiones; pa entendeles meyor, vamos ayudanos d'una simulación, onde los fenómenos gramaticales apaecen como personaxes nun escenariu ficticiu.

1. El neutru superpónse al masculín y al femenín

Simulación.- Nun escenariu ante'l públicu tán los hermanos ximielgos Masculín & Femenín. Dambos canten la canción "Sexu, tamañu y nada". Cántenla interviniendo de mou alternativu, nunca a coru. Al llau tienen al dúu Singular & Plural, que-yos echen un gabitu nel acompañamientu vocal. Pel escenariu anda tamién Neutru, hermanu de los ximielgos, cantante solitariu al qu'acompaña davezu'l so amigu Singular. Cuando a Neutru-y toca'l turnu, lo que fai ye interpretar una canción distinta, titulada "Nin uno nin otro". Pero al garrar el micrófonu tapez les voces de Masculín & Femenín, que siguen cantando, pero óyense bastante afogao.

Esplicación.- El masculín y el femenín refiérense a sexu (fíu, fía), tamañu (furacu, furaca) o nada en particular (llibru, caxa). Cuando se diz el llobu fieru o la neña llista, los axetivos concuerden en masculín o femenín. Pero en el carbón puerco o la madera vieyo, el neutru nel axetivu superpónse al masculín y femenín, y refierse a lo non-cuntable. L'apaición del neutru evíta-y al axetivu amosase en masculín o femenín, anque estos xéneros siguen visibles otramiente (por exemplu, nel artículu: el carbón, la madera). Lo mesmo asocede con elementos sustantivaos que, adscritos al masculín, piden concordancia neutra: (El) fumar ye malo, (El) que tengas que manda-yos una carta ye cansao. Un tipu especial de superposición neutra ye la que se produz col pronome lo como reproductor d'atributu. Cualesquier atributu ye reproducíu invariablemente col pronome lo, perdiéndose les variaciones de xéneru y de númberu, pero calteniéndoles nel suxetu. Asina, el neñu ye llistu - el neñu yelo, la neña ye llista -la neña yelo, los neños son llistos - los neños sonlo, les neñes son llistes - les neñes sonlo. Nestos casos, lo nun tien otra misión que reproducir l'atributu, sin relación nenguna colo non-cuntable.

2. El neutru representa al masculín y al femenín

Simulación.- En plenu conciertu, Masculín & Femenín atópense con que nun son quien a entonar nenguna canción. Pero como'l conciertu tien de siguir, ye Neutru'l que los saca de pilancu, entonando'l so tema, mientres Masculín & Femenín queden callaos n'escenariu.

Esplicación.- Trátase del "neutru de referencia imprecisa o xenérica"; ver na nuestra Gramática práctica de asturiano, parágrafu 117; na Gramática de l'Academia, XXIV.4.1.4; y nes Normes, 3.5.2.11. Esti neutru apaez cuando nun hai na oración nengún sustantivu o elementu sustantiváu col que l'axetivu pueda concordar; nestos casos el neutru alude a daqué impreciso del contestu: Nun sigas, que ta claro. Apaez tamién nos lletreros del tipu ABIERTO, PESLLAO; pa referise al tiempu atmosféricu: Nun salgas, que güei ta malo; pa referise a un conxuntu heteroxeneu d'elementos: Peres, mazanes, figos... taba too mecío. Ye corriente facer esta mena de referencies col pronome neutru: Xuan y María dexáronlo; Pasáronlo mal.

3. El neutru anula al masculín y al femenín

Simulación.- Neutru echa del escenariu a Masculín & Femenín y a los sos amigos Singular & Plural. Queda solu, a la vista del públicu y yá nun entona canción nenguna, sinón que recita'l sonetu "Doilo too polos demás".

Esplicación.- Aludimos al "neutru inmovilizador o bloquiador". Un axetivu pue dexar de selo anulando les variaciones de xéneru y de númberu -y polo tanto toa posibilidá de concordancia- y fixando la terminación del neutru. Esto asocede cuando un axetivu se convierte n'alverbiu: Él fala fino, Ella fala fino, Ellos falen fino, Elles falen fino. El neutru inmovilizador apaez tamién pa dexar sin morfoloxía'l primer elementu d'un axetivu compuestu: político-relixosu, político-relixosa, político-relixoso, político-relixosos, político-relixoses; el participiu d'un tiempu compuestu o perífrasis: Él tien falao, Ella tien falao, Ellos tienen falao, Elles tienen falao; o'l posesivu perifrásticu: el llibru de nuestro, la casa de nuestro, los llibros de nuestro, les cases de nuestro.

Cola ayuda de

Coneyería d'Educación y Cultura

Espaciu y Tiempu de la Llingua Asturiana
--Araz.net, © 2010. Tolos derechos reservaos.
Contador Estadistiques