Ruma Barbero va tar presente en Nava nun actu venceyáu a una esposición sobre'l cómic por mor de la Selmana de les Lletres

El Serviciu de Normalización Llingüística de la Mancomunidá de La Sidra, en collaboración col Conceyu de Nava, entama mientres estes feches la esposición 'Concursu de Cómic n’Asturianu Comarca de la Sidra', abierta al públicu mientres mes de mayu nel primer pisu de la Casa la Cultura Marta Portal. Nella pueden vese les obres premiaes y seleicionaes a lo llargo de los siete años nos que se caltuvo esti concursu, ún de los primeros certámenes de cómic n’asturianu que se convocaron y nel que participaron nomes como Ruma Barbero y Alfonso Zapico.

 

Precisamente Barbero va visitar esta tarde l'amuesa pa depués, a les 19 hores, celebrar un alcuentru con llectores. El xixonés va falar de les sos creaciones últimes, 'La Chelita. El Salvador 1992' y 'Aguantando cachones', y va firmar llibros.