Ovidio Zapico

25 años d’Asturies na rede

Falar d’Asturies.com ye falar d’internet. La conocida como rede de redes llega a Asturies de la manu d’Asturies.com. El periódicu fundáu por Fernando de la Fuente y David Guardado cumple un cuartu de sieglu, Izquierda Xunida d’Asturies reconoz l’enorme esfuerzu y valor de lo qu’esti mediu dixital dio y sigue dando a Asturies y a la so llingua.

Asturies.com ye más qu’un periódicu, foi la puerta d’entrada al mundu dixital de munches y munchos al nuesu país y tamién una ventana pa miles d’asturianos qu’allende les nueses fronteres queríen conocer l’actualidá d’Asturies y afondar na cultura del país. Too ello ta nesti mediu de comunicación que cumple 25 años calteniéndose firme nos sos principios de normalizar l’usu del asturianu y al tiempu ser un vehículu pedagóxicu al traviés de les sos seiciones al alcance tanto d’aquelles persones que yá yeren falantes o daquelles otres que, negaos los sos derechos educativos a recibir enseñu n’asturianu, tuvieron a Asturies.com como’l centru más afayadizu pa deprender la llingua y cultures asturianes. El papel d’Asturies.com na normalización social del asturianu ye fundamental.

Asturies.com representa l’Asturies vanguardista qu’ensin renunciar a la so cultura, precisamente poniendo la cultura asturiana por bandera, innovó y desenvuelve iniciatives qu’en munchos casos s’adelantaron n’años a les redes sociales. Too ello usando un idioma minoritariu, minorizáu, l’asturianu como amuesa Asturies.com ye un idioma de futuru. Izquierda Xunida d’Asturies güei como hai 25 años caltién la so posición sobre’l tratamientu llegal qu’ha tener la llingua vehicular d’Asturies.com que nun ye otra más que la oficialidá.

El papel del periodismu nes sociedaes plurales ye fundamental. El rigor y calidá de los sos medios ye tamién un indicador del nivel de madurez de les sos sociedaes. Asturies.com ye l’amuesa de que l’asturiana ye una sociedá madura y con voluntá de tener voz propia.

25 años a la gueta los sueños que vamos facer posibles. Norabona a Asturies.com y a tol so equipu y collaboradores por facelo. Cuntái con nós.

Ovidio Zapico

Coordinador xeneral d'Izquierda Xunida d'Asturies