Reflexón pa una tresformación social (II)

Va unos díes espublizóse en Nortes l'artículu que precede al presente. Un intentu d'averase a una posible y necesaria articulación de les fuercies y espacios que s'autoidentifiquen con una proyeición tresformadora y de cambiu pal nuesu país.

Nesti quinxere concretar dellos elementos que puen aidar a construyir esi nuevu espaciu harmónicu que posibilite y facilite un cambéu nes formes que tenemos de rellacionanos, en primer llugar; y en segundu llugar, lu articule pa, de manera efectiva, tresformar les nueses vides y el nuesu territoriu.

Pamidea un puntu partida pue ser la compilación fecha como propuesta de Reforma d'Estatutu que tuvi la suerte de redactar. Pienso que pue ser un puntu partida por delles razones:

1. La primer, porque foi compartida con dellos espacios y persones de distintes fuercies y movimientos.

2. La segunda, porque la fixe pensando nes vindicaciones clásiques y actuales de los movimientos sociales asturianos, independientemente de la so filiación política.

3. La tercer, porque atiende al marcu xurídicu fundamental de la nuesa autonomía y de la so posibilidá d'autogobiernu.

Un documentu qu'a la fin de cuentes podría servir de mínimos o como borrador anicial. Pa na únicu, y del tou modificable.

Pue consultase equí:

https://asturies.podemos.info/wp-content/uploads/2021/09/Mas_Estatutu_pa_una_asturies_meyor.pdf

En tou casu, considero qu'una dinámica interesante pa dir avanzando nesi espaciu de diferentes comunes sedría:

1. Analís de los programes y principios tanto de los movimientos sociales como de les formaciones identificaes con postulaos progresistes y tresformadores; pa darréu d'ello, facer llistáu de les coincidencies programátiques que termine por redautar ún nuevu en base a puntos en común.

2. D'otra, daqué tan cenciello como observar en qué movilizaciones toes estes fuercies (populares o elleutorales) coinciden y se manifiesten en xunteta. Articulase en base a eses movilizaciones comunes.

3. Facer esti procesu dende les asamblees municipales d'estos movimientos, espacios políticos y entidaes varies. Non dende les executives d'estos movimientos, espacios políticos y entidaes varies. Dir d'abaxo pa riba y non como ye vezu, de riba p'abaxo.

4. Establecer los puntos en común resultáu d'estos alcuentros, vertebrando un movimientu pa toa Asturies dende los conceyos y comarques.

Estos puntos en común nun signifiquen que s'arrenuncie a postulaos o matices específicos que tendrán de dir atendiéndose y llegando a equilibrios concretos per aciu alderiques. Pero l'envís o oxetivu d'esta articulación atiende a los puntos nos que podemos dir avanzando y que son compartíos dafechu, seique con matices, por toles fuercies participantes.

N'otru orde de coses, y anque d'esi espaciu participen entidaes con venceyos supraterritoriales, en dengún casu esta articulación pue tar arreyada a espacios políticos non veneceyaos a Asturies. Nun ye un espaciu, el que se pretende desenrollar, supeditáu de denguna manera a movimientos políticos o espacios políticos estatales, pesie a que ye menester qu'estos participen como un coleutivu más nesta articulación.

N'otru orde de coses:

Por riegla xeneral, los nuesos movimientos y espacios políticos tienden a la fragmentación insalvable por desalcuentros puntuales o accidentales. Munches vegaes arrastrando disputes personales a grupos políticos enteros. Estes dixebres atienden más a les diferencies qu'a los puntos en común que tenemos. Paez resultar más cómoda una posición irredutible y estática, que'l moyase na voluntá de xenerar aiciones conxuntes d'avance social, políticu, cultural o económicu.

Asturies vive na eterna resistencia de los sos movimientos sociopolíticos. Nel eternu pesimismu. Na eterna sensación de derrota. Nun bucle onde la FSA, por poner casu, vive fantásticamente desaniciando Asturies y afondando na paralís. Dexando que'l tiempu pase pa que tolo lleve.

Tenemos cuásique la obligación de reconocenos y trabayar a comuña pa (re)construyir un país al que condergaron a vivir nel autodespreciu permanente. Na desintegración, tanto del so movimientu obreru clásicu, per aciu d'un desmantelamientu industrial ensin reposición productiva; como de la so identidá concreta, dexando morrer tanto les sos llingües como les so práutiques tradicionales (pesie a tar dambes costiones recoyíes nun Estatutu d'Autonomía más que probe).

Pamidea, la práutica totalidá del espaciu políticu tresformador, percibe la realidá de manera asemeyada. Nun se ve con fuercies pa reponese, pero tampoco achisba confianza na so redolada. Vencer les suspicacies mutues ye un llabor pernecesariu pa poer facer y realizar. De manera un tanto ñoña podría camentar facer maxa, que nun ye otra cosa que tanxibilizar los nuesos maxinarios. Realizar, que nun ye otra cosa que facer real dalgo que nun lo ye entá.

Tenemos toos y toes bones intenciones, anque munches vegaes quedemos nes coraes y na bilis. Nel rencor y na sospecha. Venzamos, entós, esta perceguera tan grande qu'acarretamos cuantayá, y pongámonos hombru con hombru a amosar qu'Asturies tien futuru, porque les persones que l'habiten nagüen por qu'asina seya.