Pautu del Astilleru

David Coto's picture

Anden de norabona en Somió los vecinos del presidente Javier Fernández. Col nuevu reglamentu internu del PSOE, aprobáu por unanimidá anque con ausencies el caberu 17 de febreru, paez que les consultes de los partíos a les bases y simpatizantes entamen a ser una ferramienta afayadiza pa tomar según qué decisiones.

La llexislatura municipal entamaba en Xixón col glayíu escomanáu del PSOE denunciando'l Pautu del Astilleru: un alcuerdu secretu entre Foro y Xixón Sí Puede (XSP) col oxetivu únicu de arrequexar a los socialistes na irrelevancia.

La consulta popular na que decidir el votu na investidura nun yera si non el mazcaritu escoyíu pa ocultar l’ansia d’aniquilación d’una xente que namás naguaba pol desaniciu del Partíu Socialista eleición tres eleición. Nun queda nidio del too si’l fechu de que seya Pedro Sánchez agora'l qu'abrace esta ferramienta vien a refutar o reforciar esa teoría.

El casu ye que va rematando la llexislatura y, echando una güeyada a les actes de los plenos del Ayuntamientu de Xixón en 2017, nun hai forma de qu’apaeza’l pautu dichosu. Dexando de llau les votaciones resueltes por unanimidá, hebo alrodiu de 140 votaciones onde los grupos municipales asoleyaron les sos diferencies a la hora d'aprobar o refugar proposiciones, alcuerdos o enmiendes de tou tipu.

El partíu col que más coincidió nes votaciones XSP foi Izquierda Xunida (IX), un 30 por cientu, casi 120 veces; siguíu del PSOE, cuasi un 20 por cientu y más de 80 votaciones. Pola so parte, Foro algamó les más de les veces alcuerdos con Ciudadanos (27 por cientu), dempués con Izquierda Xunida (21 por cientu) y en tercer llugar apaez XSP…, coles mesmes coincidencies que’l PSOE (20 por cientu).

Si bien esti análisis nun tien nengún ánimu científicu, taremos d'alcuerdu en qu'esti repartu d’alcuerdos y desalcuentros entra dientro de la más pura llóxica ideolóxica y parllamentaria, cola esceición de l’amontamientu tresversal ente Foro y IX y el pecáu orixinal de Foro y PP. Estes menes d'actuación calquen amás al milímetru les ubicaciones na escala idelóxica de los partíos, que los sos votantes establecieron nel barómetru del CIS de xineru de 2015.

Echa-y la culpa al empedráu cuando se dexa'l poder suel ser una bona escusa pa mantener prietes les files escontra dalgún enémigu esternu, seya Anguita, IU n'Estremadura o Cascos, Cándido y Morala n’Asturies. Pero a la llarga, nun fai si non esconder lo que daquién de les Cuenques que vive en Xixón entiende de la mesma manera qu’ún, digamos, de Dos Hermanas: l'axuntamientu durante casi 40 años d’un poder municipal, sindical y autonómicu asfixante. Una inercia que lleva a asumir que, en dellos llugares, determinaos partíos van ganar lo mesmo si presenten nes llistes a la familia Los Bolechas.

Quiciabes nun foi nengún pautu robláu a media lluz en Montico de madrugada, nin hubo maletos enllenos perres esnalando a l’altura la Naval. Quiciabes los fiyos ideolóxicos d'esa oligarquía fixeron d'Edipo pa frayar la única superestructura de poder que conocieren.

Una superestructura desdendolcada dende toles estayes de la política a lo llargo los años, que parasitó la sociedá de dellos llugares. Una sociedá enllena de xaronques como les que meten a ferver nuna pota, caleciéndo-yos tan seliquino l'agua que nun son quien a notar la diferencia de temperatura y muerren nel fervinchu ensin enterase, sin gurgutiar siquiera.

Pa más d'una xeneración y media esa superestructura foi too aquello qu’había que camudar. Porque si les coses nun furrulen y el sistema ye inxustu, cualesquier atisbu de rebeldía y ánimu tresformador tien que voltiase escontra'l poder. Y equí, entrúguemeslo tú, el poder yeres tú.

David Coto, periodista.

Contador Estadistiques