La xusticia social empieza cola educación pública

Carlos López-Colina Pérez's picture

Nestos díes vemos nel centru'l discutiniu de los presupuestos d'Asturies un asuntu rellacionáu cola educación: el grau d'estensión y gratuidá de les escueles de cero a trés años. Ensin dulda, lo deseable ye la universalización d'esa etapa como pública y gratuita y la propuesta d'Izquierda Xunida (IX) qu'apocayá reflexaba eses intenciones foi aprobada por unanimidá na Xunta Xeneral. Entós, ¿ónde ta'l discutiniu? Les diferencies ente grupos políticos tán rellacionaes principalmente con cuándo ye posible algamar la gratuidá total (si pal próximu cursu o como un oxetivu de futuru) y en qué entienden dalgunos por “educación pública”. Siguiendo la so propia interpretación de lo público, los trés grupos de la derecha, grandes defensores de la educación concertada, sorprendentemente, sofitaron la propuesta d'IX ya inclusive votaron pola gratuidá del ciclu pal próximu cursu a propuesta de Ciudadanos.

Dende'l desconocimientu de los detalles concretos del alderique parlamentariu, lo que ta claro ye que la educación privada subvencionada con dineru público nun pue llamase “educación pública”. Poro, cualquier defensor d'ésta tien de convencese de que, anguaño, la mayor torga pa la educación realmente pública nos niveles obligatorios ye'l sistema de conciertos con centros privaos. Ye induldable qu'esti sistema y los métodos de la concertada pa, directa o indirectamente, refugar l'alumnáu probe, causen segregación, dexando a la educación pública trepar colos problemes y los escolinos menos “rentables” en términos económicos y académicos. Los datos tán nidios: según encuestes de 2011 ente alumnos de 4º de la ESO, un 45 por cientu de les families asturianes que llevaben a los sos fíos a colexos concertaos ganaben más de 2.000 euros, pero esti porcentaxe yera sólo del 32 por cientu na pública. Esta desigualdá tien la so repercusión directa na percepción y les preferencies de los padres y lleva a un círculu viciosu qu'a la fin fortalez a la concertada, debilitando y dexando la pública cuasi como una rede secundaria y de subsidiu.

Diferencies socioeconómiques familiares pública-concertada n'Asturies

Los datos publicaos añalmente sobro'l financiamientu de la educación amuesen l'aldu privatizador, pero ye verdá que nun podemos cha-yos tola culpa a los gobiernos del PP. El Gobiernu d'Asturies, del PSOE y con competencies n'Educación, trabayó pola enseñanza concertada como otru gobiernu de dereches. El gastu públicu total de 2016 pa la educación asturiana tuvo un 16,5 por icentu perbaxo'l de 2008 (el más altu hestóricamente). Evidentemente, podríen escudase nos retayos presupuestarios impuestos dende'l Gobiernu central de Rajoy, pero entós, ¿por qué nun pasó lo mesmo en toles partíes d'Educación? El gastu dedicáu a los conciertos con colexos privaos, en cuenta de baxar, medró un 6,3 por cientu nesos 8 años de crisis. Que la repartida de perres seya ésta, privilexando la concertada y estendiéndola demientres retayen na pública, ye una decisión que poco tien de “socialista”. La igualdá d'oportunidaes y xusticia social namái tien un camín políticu, y ési ye, precisamente, el contrariu al siguíu hasta agora y que llevó a un 25 por cientu d'alumnos na concertada n'Asturies y a un 30 por cientu n'España (cuando la media n'Europa malpenes ta nel 10 por cientu). L'oxetivu, por tanto, tien de ser la progresiva mengua de conciertos educativos con instituciones privaes en toles etapes, principalmente nes obligatories. Un bon principiu sería la inspeición y rescisión de los conciertos con aquellos qu'incumplen la llei cobrando cuotes obligaes. Esi simple cumplir cola llegalidá acabaría cola gran mayoría de conciertos educativos. El 96 por cientu de concertaos cobren, según l'últimu informe de la CEAPA. Y esos cobros son, precisamente, ún de los principales motores del círculu viciosu de la segregación.

Variación nel presupuestu d'educación n'Asturies respectu al de 2008 (www.mecd.gob.es)

 

Carlos López-Colina Pérez ye miembru del Área d'Educación IU Xixón.

 
Contador Estadistiques