Entro nel chigre con priesa

Eva del Fresno Díaz's picture

Entro nel chigre con priesa –como davezu– y voi pa la barra. ‘15 minutos, non más’, pienso, pa sentame un poquiyín y tomar una caña. A  la mio vera aposienta ‘El País’, edición del 30 de mayu. Ruina, ye verdá, pásaseme pela tiesta la imax afamiada del animal de la prensa plumiao y recóyolo con señardá. Una caña ya un periódicu pa poneme al día ye un bon plan ya anímame dalgo, quiciás hasta los 15 minutos s’allarguen, polo que me siento nuna de les meses del fondu. 

Na portada Sánchez da'l so sofitu a Rajoy pa torgar el referéndum ya embaxo una semeya en grande coles protestes d'Alhucemas. Un garapiellu de rapazos indignaos coríen consignes colos brazos llevantaos escontra la corrupción, la represión ya'l desemplegu. La detención va dellos díes del líder de la protesta nun llogró apagala. Siento una fola d'empatía darréu cuando veo les sos cares tan moces (o polo menos a min paécenmelo). 

Tando cola guardia baxa espántome al pasar páxina ya atopame con Trump cara a cara. Los sos güeyos observen acesnando embaxo la escuridá de la frente. Nun mira pal fotógrafu, sinón a dalgo o dalguién más p'allá a lo que paez odiar enforma. Na páxina izquierda'l dibuxu d'un home amuesa la llingua cruciada per una allambrada ya embaxo diz: "ente lo que pienso y lo que digo hai una frontera" –bona fras; a min pásame–. Na páxina siguiente Macron y Putin pasien xuntos pel Palaciu de Versalles. ‘Demasiao oru enfastiáu’. Paso una páxina –una muyer recarga un coche llétricu– y otra páxina... Un rapaz de Rabat amuesa un megáfonu enriba la xente. Llueu una noticia curiosa con semeya incluyía de dellos policíes prindaos: Buenos Aires espulsare a 5.000 policíes en 18 meses por cargos de corrupción, violencia de xéneru, connnivencia con narcotraficantes y proxenetes. 

Sigo p'alantre yá ensin muncha gana. Rajoy ya'l primer ministru portugués falen; a la vera una semeya de xente surdiendo de la Generalitat, protagonizada tamién por homes. Nun voi nin pela metada y yá sé l'anuncia que busco: ‘¿Ónde diaños tamos les muyeres?’. Queda claro que nun tamos dirixendo la política internacional nin nes cais de Marruecos, onde una moza pue ser acosada cada dos minutos por llevar vaqueros mui amarraos, nin nes files de la Policía corrupta de la que somos víctimes en Buenos Aires. Avanzo cola esperanza d'alcontranos nes siguientes seiciones masque llueu de dalguna apaición discreta n'anuncies de política nacional lo que vien ye un fechu ensi desplicación: les muyeres desapaicimos. 

Más p'allá del marxe civilizáu onde hai cargos qu'apurren identidá a les que ye menester nomar por obligación, el restu les páxines ye lliquidez suxetiva que tragare les muyeres y tamién les mios ganes de siguir lleendo. De les 23 semeyes qu'agüeyo magar entós 18 son d'homes, da igual que sían empresarios, deportistes, artistes, amigos que los conocen o guisanderos. Pero, ¡un momentu! Hai dalguna muyer que ye anuncia. Prúyeme ver l'espaciu nel que podemos visibilizanos... Quiciás sía un bon nichu d'emplegu. La imax ye de Doña Leticia: ‘¡vaya, eso ta coyío!’.

Na páxina siguiente apaez una anuncia con una de les poques imáxenes femenines. La cara ta cortada al altor del cazu. Llleva un vistíu blancu y llisu que furrula como llenzu  Énte él una copa medio enllena de vinu prieto imita'l llanuxu púbicu… Miro esi montón de papel ensin vida, sé que ye babayo enfadase con un oxetu, pero'l pelegrinar foi duro y pienso ‘bébeme'l vinu’. Fáltame lo gordo d'una fueya pa terminar de cabreame. Yá entós apego con dalgo que relluma nel fondu de la penúltima páxina: Robin Wright, l'actriz de ‘House of Cards’, fala nuna entrevista de la so carrera y de la so batalla a favor de la igualdá salarial y del feminismu.

Diz, "el mesmu trabayu, el mesmu sueldu" y que “el feminismu ye la inclusión de toos de forma igualitaria", teniendo en cuenta que “la fama me permite tar ehí, ye bono caltener el mensax altu y claru". Salgo del chigre con más coraxe, dispuesta a dexar que les coses m'afecten. Y merco ‘El País’.

Eva del Fresno Díaz ye trabayadora social y especialista en polítiques de xéneru pola Universidá d'Uviéu, feminista y afialiada a EQUO Asturies.

Contador Estadistiques