Asturies por responsabilidá hestórica

Pablo M. Testa's picture

¿Hasta qué puntu mos autousurpamos la nuesa hestoria?

Nun esistiendo lo romanticón del 'espíritu del pueblu', sí que falamos, hestóricamente, d'aquellos que morrieron pa que nós tuviéremos 'x' derechos, 'x' llibertaes, 'x' reconocencia cultural... ¿Nun esiste contradicción? ¿Hasta qué puntu esiste la conciencia hestórica pa ciertos llogros (o pa sentinos deudores d'ello), y hasta qué puntu mos desprendemos de la conciencia hestórica n'aspeutos más bien culturales, identitarios?

De la mesma forma que'l facismu recueye l'ideariu socialista pa retorcelu y facelu illexible, pa contaminalu y desfiguralu, el nacionalismu fai lo mesmo cola idea soberana de los pueblos, finalmente enfrentándolos, de tala manera, que'l nacionalismu centralista lleva perbién la esistencia de los nacionalismos periféricos, ensin tragar tan fácilmente les idees soberanistes, que nun teniendo por qué frayar la unidá territorial del Estáu, supón una menacia pa les idees más uniformadores, homoxeneizadores, centralistes y verticales.

Claro qu'esiste un nacionalismu imperial; o un nacionalismu de la Nación Política sobre aquelles naciones non estatalizaes. Y al mesmu tiempu una colonización de formes culturales, una colonización de les formes de vida, una colonización llingüística y una colonización de la memoria, que ye la más grave; que desanicia la narración d'un territoriu.

Como nun creo qu'esista'l volkgeist tal cual foi destripáu, pero sí la conciencia hestórica, resúltame igualmente nociva la idea de dexar pa prau los derechos sociales algamaos polos nuesos ancestros en sieglos de llucha que pasar olímpicamente o, pior entá, donar a otru lo qu'un territoriu coles sos poblaciones foi quien algamar, a representar, seique a ser. Neso básase y fundaméntase la Colonización de la Memoria: en desarticular la narrativa d'un sitiu, d'un colectivu, d'un pueblu, pa o bien direutamente esborrala o bien, que ye'l casu asturianu, nun la negar pero treslladala y asitiala nuna suerte de pica ulterior, 'reconfortante'. La hestoria de lo llamao y entendío como astur o asturiano ta supeditao nel maxinariu asturianu y colectivu al discursu español y/o castellanu.

Préstame enforma sentir el programa de Pablo Iglesias 'Otra Vuelta de Tuerka'. Abúltenme más qu'interesantes les sos entrevistes, y más interesantes tovía los convidaos y convidaes quiciás que l'entrevistador, al qu'almiro, por embargu, na so estaya académica (lóxicamente con salvedaes). Dizse que'l movimientu 'xunteru' de les famoses xuntes decimonóniques, o inclusive'l propiu 15-M, respuenden a una idiosincrasia castellana, cultural y territorial, daqué esgrimío na entrevista al filósofu José Luis Villacañas.

Siento discrepar con ello. En tou casu, Castiella garra formes territoriales y organizatives propies de los reinos a los que pertenecía: Reinu Astur-Lleonés y Reinu de Pamplona. La fórmula de Xunta ye propia'l norte de la Península, non de Castiella como tal, y en tou casu a mio mou de ver, de selo, respuende non al fechu castellanu, sinón al mundiu celtíberu, magar que la Xunta como figura seya un elementu medieval.

La forma organizativa gallega o astur-lleonesa respuende a una xebra alministrativa por conceyos que dempués son representaos y elevaos na Xunta. Como ocurriere cola Xunta Xeneral d'Asturies aconceyada per vez primer en 1115. El Condáu Castellanu, surdíu nel sieglu IX baxo'l dominiu asturlleonés, foi pobláu por ástures, cántabros, vascones y posibles descendientes de los bárdulos (hai de tener en cuenta que'l nomatu orixinal d'esta tierra yera Bardulia).

A lo que vamos ye que Castiella, como reinu, apaecerá mui a posteriori del surdimientu del resto de reinos, sedrá en 1065 cuando'l rei Sancho II seya coronáu, habida cuenta del repartu ente fíos del rei de Lleón, conformando un nuevu reinu. Dalgo, por cierto, mui propio tanto de vascones como d'otros –hai de recordar que na guerra ganada por Fernando I féxose una alianza ente'l Condáu Castellanu y el Reinu de Pamplona pa destronar a Bermudo III de Lleón–. Alfonso III tamién fexo repartu de territorios na so dómina, surdiendo por exemplu la entidá política de Reinu de Galicia (Ordoño I de Galicia). Hai de facer alcordanza tamién que'l Conde Fernando, llueu rei de Lleón, nació en Lleón y recibió'l condáu por dimposición del rei Sancho Garcés III "El Mayor" de Pamplona, cuando esi Reinu tevo una hexemonía clara y el Condáu de Castiella taba supeditáu a él.

¿Qué queremos dicir? Que les formes territoriales y alministratives asumíes por Castiella, fuere como condáu o como reinu, tuvieron atravesaes formal ya informalmente polos sistemes culturales del norte de la Península. Esti fechu fadrá por exemplu que la corte castellana seya itinerante, s'asoleye como descentralizada y caltenga pelos sieglos intentos de separtación de los territorios del norte entendíos como entidaes diferenciaes anque evidentemente hermanes.

Nesa colonización posterior de la memoria asocede que lo que vien llueu s'éntepon a lo que lo precede. Asina díxose siempres, pa desgracia de nós, que la nuesa llingua yera un dialeutu del castellán o yera falar mal castellán; o que'l movimientu de cuntes yera una espresión cultural castellana; o que'l Reinu d'Asturies yera l'entamu del Reinu d'España (que como tal enxamás esistió hasta bien entrada la Edá Contemporánea); o, diendo muncho más lloñe y por facer alcordanza de les frases llamatives del ex presidente M. Rajoy, que la cuna del parllamentarismu européu yera Inglaterra. Bono, nin que dicir tien que la cuna d'esi progresu políticu afáyase nes Cortes de Lleón de 1188, anque esistieren meses enantes otres asemeyaes en Castiella convocaes en San Esteban de Gormaz (Soria). Dicimos asemeyaes porque les convocaes por Castiella en Carrión de los Condes (1188), pese a tener representantes de les villes, éstos nun yeren representantes del común; yeren funcionarios de nomamientu real y amás ensin capacidá de votu, polo qu'entendemos qu'asina asocediere nes anteriores de San Esteban.

D'igual mena, asocede qu'una de les figures más solliñables del nuesu Derechu Consuetudinariu y poco esplotaes anguaño, la de Conceyu Abiertu, fai alcordanza de la estructura comunitaria de les fasteres que caltienen formes tradicionales de rellación. Asina igualmente son granibles aquelles de propiedá comunal o de coxestión del territoriu y la casa como la sustiferia o l'andecha.

Per otra parte, y atendiendo igualmente aquella apreciación de Villacañas ya Iglesias sol 15M, diré que nun sé si respuende al 'xuntismu', pero de xuru que respuende al urbanismu (yá que nun se da nel mundiu rural, y Castiella ye fundamentalmente rural); ye municipalista qu'entronca cola rama más radical (nel bon sentíu) del republicanismu despliegáu nel Estáu Español y que tien como llugares hestóricos d'importancia el Cantón de Cartagena o les idees asoleyaes por Pi y Maragall o Garrido, asina como asambleariu –propiu en tou casu de la tradición llibertaria fuertemente enraigonada nel Estáu–.

¿Que podemos dir más alló tovía? Evidentemente sí. Y de fechu sí que podemos amestar que la cultura política y organizativa de la Península caltuvo siempres ciertes formes que podemos considerar 'ancestrales' ensin cayer en 'magufismos' románticos. Podría inclusive arriesgame a considerar que nel Estáu se caltién nel sustratu cultural unos tipos de relación, una riestra maxinarios que vienen de mui lloñe y que van resucitándose ca cierto tiempu, magar que les persones vaigan morriendo.

Y esta cuestión evidentemente daría pa otru testu muncho mayor, pero sí que ye solliñable y necesariamente manifestable. ¿Cuála entós ye la responsabilidá del nuesu pueblu? ¿Consideranos cenciellamente dientro del agregao d'identidaes? ¿O necesitamos como pueblu reconocer los nuesos aciertos y erros?

¿Asturies necesita una muleta supuestamente ulterior pa desendolcase o tien capacidá de sobra p'autobiografiase? ¿Asturies necesita referentes esóxenos y descontestualizaos o pue autoafirmase como tierra de progresu, llibertá y sofitu mutuu? ¿Asturies ha de tar subordinada, como nestos caberos tiempos –siendo amables dende 1835– o ye quien a reconstituyise atendiendo a la propia hestoria y pruyimientos? ¿Cómo podemos poner a toda marca la denomación 'Astur' y nun aceutar que somos un pueblu soberanu? ¿Qué implica soberanía? ¿Llibertá pa edificar y repetir un estatalismu ineficaz o llibertá pa decidir cómo queremos tar nel mundiu al marxe d'estaos propios o ayenos?

Asturies como estensión hestórica dixo muncho al mundiu, aportó infinidá de coses pesie a ser un país tan aparentemente pequeñu. Lluchamos siempres por nós y polos demás. Nun mos rendimos pero tamos cayendo nuna resignación y una apatía que mos neutraliza. Asturies ta a les puertes d'un desaniciu total y ye responsabilidá de los y les asturianes poner fin al esmantelamientu de lo que somos y fuimos: esmantelamientu de lo productivo, esmantelamientu de les nueses formes de vida; esmantelamientu de la nuesa demografía; esmantelamientu del nuesu paisaxe, del nuesu mediuambiente y la nuesa salú; esmantelamientu de les nueses cosmovisiones; esmantelamientu de la nuesa ruralidá, de les nueses práutiques sociales y comunitaries; esmantelamientu de la nuesa cultura y la nuesa memoria; esmantelamientu del territoriu en toles sos formes... ¿Y qué? ¿Vamos quedar paraos y paraes? Nós, que siempres vamos de grandones, d'indomables, d'exemplu de llucha y resistencia... Nós, que siempres mos presentamos y mos presenten como la lluz qu'alluma cuando la escuridá se cierne sol mundiu... Seyamos quien, entós, a reafirmanos na épica si se quier pa sobreponenos a la nuesa sele desapaición.

Si fuimos tan innovadores como pa xenerar una cultura prehestórica, llamada asturiense; si fiximos venir a un emperador per primer vez a frenar la nuesa resistencia; si fuimos quien a rebelanos continuadamente escontra un imperiu; si caltuvimos polos sieglos formes de vida pesie a l'aculturación d'otros; si nun pudieron les invasiones xermániques dobleganos o la conquista musulmana absorbenos; si fuimos quien a constituyir un reinu nos anicios del medievu col so propiu arte y el so propiu desenrollu; si fuimos quien a enteponenos a les circunstancies amargoxes; si mos resistimos siempres a que mos dixeran lo que teníemos, non yá de facer, sinón de ser; si declaramos la guerra pola nuesa cuenta a Napoleón; si mos decidimos llevantar escontra la inxusticia atribuyéndonos la 'última revolución obrera'; si fiximos frente al facismu inclusive nel aisllamientu; si continuamos lluchando escontra la bestia en monte; si decidimos facer frente al franquismu dende l'arma más tarrecible por él, como yera la Fuelga, primero en La Camocha, güei asediada poles inxusticies más absurdes, llueu cola llamada Güelgona que dexó al franquismu xeláu, ya igual que vieno Augusto a derrotar a los ástures fiximos venir hasta equí a un ministru de Franco nada más y nada menos que pa negociar y facelu claudicar... Que continuó la so aición pola xusticia social nos 80, nos 90 y nos 2000 pesie al mafioséu clientelar de dalgunos qu'empuercaron y empuerquen el bon facer de la mayoría, les esperances de la mayoría, los pruyimientos de la mayoría...

Y güei, ¿qué facemos? ¿Qué-y toca facer a la nuesa xeneración, cuando toles xeneraciones asturianes aportaron daqué y sirvieron de xingón d'una llucha xusta; y la que recurrimos con nostalxa siempres que podemos, pa nomala y recordala? ¿Qué ye lo que fadremos? ¿Miraremos simplemente al pasáu con señaldá, con tristura y resignación? ¿Executaremos un onanismu hestóricu diciendo lo estupendos que fuimos? ¿O tomaremos les riendes de nuevu de les nueses vides faciendo gala d'esa señaldá y mos pondremos manes a la obra pa facer otra vez frente a les inxusticies y los autoritarismos? Seyamos la xeneración que reclamó lo que mos pertenez, no simbólico y no material.

Contador Estadistiques