"Asturias libre": un misteriosu sellu nos entamos del sieglu XX

Pablo R. Alonso's picture

 

El 20 de xunetu de 1906 el periódicu madrileñu de tendencia lliberal El Globo asoleyaba na so portada un comentariu col títulu de ¡Asturias libre!. Con esi llamativu epígrafe facía mención a l’apaición n’Asturies d’unos sellos d’orixe desconocíu que col escudu d’Asturies llevaben esa frase. Facía de pasu una valoración crítica del fechu al señalar que “teníamos catalanistas y bizkaitarras enamorados de la emancipación, autonomía y libertad de sus provincias convertidas en nacionalidades a la medioeval usanza. Teníamos los gritos de ¡Visca Catalunya lliure! y ¡Viva Vasconia libre! (…) Pues bien: Asturias se acuerda de Covadonga, y como si el resto de España estuviese nuevamente en poder de los sarracenos, aspira a su independencia, al grito de ¡Viva Asturias libre! (…) Cataluña, Vasconia, Asturias…Después vendrá Galicia, luego Extremadura, seguirán las Andalucías, Valencia, Murcia, Aragón Castilla. ¿Y no sería muchísimo mejor, en vez de aspirar a la libertad de los átomos, procurarla del conjunto? (…) Pues ahorremos saliva y gritemos “¡Viva España libre! ¡Libre! ¿Y de qué? De los que vociferan vivas semejantes”.

D’esta manera’l periódicu de la capital d’España alvertía a los sos llectores del posible efectu contaxu de les aspiraciones nacionalistes vasques y catalanes n’Asturies y nel restu de territorios. Al día siguiente El Heraldo de Toledo también recoyía’l fechu, con un comentariu entá más opuestu, yá col significativu títulu d’Antipatriotismo nel que, tres echar contra’l catalanismu, denunciaba que “hemos visto un sobre procedente de Oviedo, ostentando un sello separatista asturiano, sello ciertamente muy artístico, pero que nunca debió consentirse que circulase cuando lleva un rotulo que dice ‘Asturias libre’. ¡Asturias libre!...¡Cataluña libre!... Es preciso proceder enérgicamente, inflexiblemente contra esas imbéciles locuras antiespañolas”. El mesmu artículu reproduzse n’El Heraldo de Alcoy el 23 de xunetu,

Al día siguiente otru diariu lliberal madrileñu, El Día, facía referencia al mesmu asuntu de forma más aséptica, conseñando que “en un centro oficial se ha recibido una carta anónima de Asturias en la que se censura la conducta económica del Gobierno. Acompaña la carta un sello de Asturias con un rótulo arriba y otro abajo que dice: Asturias Libre”.

¿Cuál yera’l conteníu d’eses cartes enviaes a centros oficiales? Nun lo sabemos directamente, pero sí de forma indirecta al través de la prensa. Si n’El Día falaba de cuestiones económiques, otru periodicu de la mesma fecha, La Correspondencia de Valencia, conseñaba que “se ataca en ella la política económica del gobierno”. Tamién el ministru d’Hacienda recibirá una d’aquelles cartes col sellu, en contra de la so xestión, según informaba’l periódicu biselmanal castellanu-manchegu La Región. Una última pista dánosla’l diariu santanderín El Cantábrico, qu’afita que recibióse una carta nel Gobiernu Civil de Madrid “con la inscripción Asturias libre” protestando “contra la conducta arancelaria del Gobierno”.

La noticia siguió dellos díes más circulando per una docena de publicaciones de tola xeografía española, llegando n’algún casu a encabezase la información cola frase Separatismo asturiano, como fadría’l 25 de xunetu El Noticiero Extremeño, diciendo que “parece ser que se notan síntomas de haber comenzado a germinar el separatismo en Asturias, viéndose algunos sellos con la leyenda: Asturias libre”. La última referencia que tenemos al usu d’esti sellu ye’l 7 d’agostu, cuando’l selmanariu republicanu editáu en Toledo La Idea conseñaba que “en un alto centro oficial de la capital del Estado se recibió hace algunos días una comunicación, sin firma conocida, de Asturias, conteniendo graves amenazas contra todo intento de avance liberal. El hecho ha producido el natural disgusto e indignación; es el colmo de la más odiosa estupidez”.

Sicasí non tolos comentarios van ser negativos pa cola anónima iniciativa. El primeru d’agostu aquellos iniciales comentarios d’El Globo diben ser contestaos pol selmanariu federalista El Nuevo Régimen, editáu tamién en Madrid. Nun comentariu na so portada señalaba qu’El Globo muéstrase “a un tiempo admirado y mohíno de que el ideal autonomista cunda”. Y a continuación conseña que’l diariu madrileñu “lanza a renglón seguido unas cuantas herejías de derecho público, dando a entender, no solo que desconoce lo que es la organización federal, sino que ignora hasta la historia de Asturias y de España toda”. Y fina la contestación insinuando que l’autor del mencionáu artículu pretende “dirigir la opinión sin comprenderla”.

Anque como vemos hubo cierta repercusión y hasta polémica na prensa española, aquella historia del sellu bien ceo cayó nel olvidu. Y del sellu y de los sos creadores (o creador) nunca más se supo. Nun conocemos el so orixe y si foi una iniciativa individual o d’algún grupu rexonalista. Pero lo qu’agora si sabemos ye que’l sellu efectivamente existió y circuló lo mesmo per Madrid como pela propia Asturies. Hai un par d’años topélu nun fondu documental, xunto a un comentariu manuscritu qu’espeyaba les poques simpatíes del autor pa cola iniciativa:

“Estos sellos circularon, clandestinamente, por Asturias con bastante profusión hacia 1902, cuando la cuestión catalana comenzó a agudizarse. Supongo que serían cosa de algún ocioso o estúpido; nadie les concedió importancia y se tomaron a risa. A mí me los dieron en Gijón”.

L’autor d’esti escritu bien pudiere ser Leopoldo Alas Argüelles, futuru rector de la Universidá d’Uviéu y fiu del célebre autor de La Regenta, por cuenta de les feches conseñaes y qu’alcontrelos ente los papeles del archivu familiar Tolivar-Alas, anque la so autoría nun puedo confirmala dao que’l mesmu fondu documental abelluga papeles de Fermín Canella tamién. En cualesquier casu, tanto’l primeru que militaría nes files del republicanismu burgués como’l segundu nunca amosaron muncha simpatía pa colos movimientos autonomistes. Sicasí, y más allá de les valoraciones suxetives que fai, dellos datos rescamplen del comentariu. El primeru qu’efectivamente confirma que se distribuyeron ampliamente pela Asturies d’aquella dómina. En segundu llugar da la fecha de 1902. Nesti casu puede ser un lapsus al escribir el comentariu años depués, dao que les cartes col sellu recibiéronse en Madrid cuatro años depués, y seguramente si hubieren circulao durante toos esos años tendríemos más noticies sobre l’asuntu. Y finalmente qu’apunta a una iniciativa individual y venceyada a la llamada cuestión catalana.

Esto último ye importante pa conocer el contestu del sellu. La consolidación de los movimientos nacionalistes subestatales en Cataluña y País Vascu llevó n’aquellos años al centru del debate políticu español la cuestión territorial, nun sistema’l como’l de la Restauración caracterizáu pol centralismu. Esti debate daríase n’Asturies de la mano del federalismu yá desde les últimes décades del sieglu XIX y tamién desde’l rexonalismu nes primeres del XX, y qu’acabaría por concretase na conocida Junta Regionalista xunto a otres iniciatives menores. Puede qu’esti sellu clandestín fuere una temprana manifestación, individual o colectiva, d’esi rexonalismu. Sí sabemos qu’esi lema, Asturias libre, sedría posteriormente usáu pol alma mater del rexonalismu asturianu d’aquella época y coautor de la Doctrina Asturianista, Álvaro Fernández de Miranda. Pero nun hai prueba definitiva qu’amuese que fuere él l’autor o coordinador d’esta misteriosa iniciativa.

Fuere como fuere, con esti breve artículu pretendo rescatar una pequeña parte de la historia d’Asturies y del movimientu autonomista asturianu.

Pablo R. Alonso ye historiador.

Contador Estadistiques