Amar una llingua

Lo más guapo d’una llingua ye cuando nun te decates nin que la fales, namái yes a facer que suene como un alborecer que cuerre ente l’agua del riu que pasa pel pueblu que la noma; que filvane soníos perdíos ente les pantasmes que te remembren que yes d’elles, que naciste d’elles, de los sentimientos que texeron pa ti.

Una llingua arraña los versos d’un árbol de frutes que siempre allampiaste comer, qu’espoxigó de la sencia de la poesía, del amor a la tierra, a los tos ancestros, a la vida. Sílaba a sílaba, pallabra a pallabra, fras a fras arreciende a música del espíritu de los vecinos, la familia, to alma…

Madre cambiónos el chupu pola llingua, amamantónosla demientres entecruciábemos los güeyos enllenos de significaos, de cariños, de veyures que nos xunten, que nos faen ún.

Pero en dalgún intre la vida, l’odiu achuquinó a l’amor a la llingua. Foriatos a ella entamaron a dicite que nun fueres aldeanu, que falares bien, qu’emplegabes un dialeutu vulgar a esgaya del español (na constitución dáse-y el nome de castellanu y non español)… Con mentires y odiu, la política nagua por acabar cola llingua; la política, semadora única del odiu ente los homes, acientífica que llama a les llingües dialeutos, que se noma la responsable de facer oficiales o non oficiales a les llingües nun actu d’irresponsabilidá. Y xueguen a cambiase cromos, cromos que pa los políticos valen más qu’una llingua fecha col sudu de la xente d’un pueblu, amuesa clara de cultura, la cultura con mayúscules, la cultura de los ciudadanos, la cultura del pueblu.

Duelme, duelme que tomen a xirigoncia a les llingües d’Asturies. Unos por ser neofranquistes a la escontra de tola cultura, de toa llingua, que nun seya la qu’ellos nomen como la de toos. Otros, por nun tener consideranza con ella, la llingua ye lo más importante del pueblu, d’Asturies, y xugar con ella ye insultante, tán insultándonos a tolos asturianos. Seyan los tres bederres, o los cuatro chuminos que nun son a entender la importancia d’una llingua, los siete amosen a Asturies y a los asturianos que la política ye lo peor.