Altor de mires. Asturies, a lo cimero

Fernán Morán's picture

Asturies ye una nación milenaria. Asturies tien hestoria, cultura, tradición, padremoñu, llingües... Entós, ¿qué pasa n'Asturies?

¿Qué ye lo que fai falta pa que fuercies polítiques y sociales se pongan d'alcuerdu nunos pocos finxos básicos, comu pueden ser el territoriu de la nación asturiana, la oficialidá del asturianu ya'l gallego-asturianu, la reforma l'Estatutu d'Autonomía d'Asturies, el proyeutu de buscar la condición de Ñación Hestórica –nun soi a pescanciar nenguna otra nación na Península Ibérica que lo mereza más–, la Universidá d'Uviéu –creo que toos/es alcordamos en qu'hai demasiau OPUS dientru ¿non? –, el caltenimientu y proteición del Padremoñu Hestóricu-Cultural y Ñatural, la laicidá del Estáu asturianu, una Sanidá ya Educación pública y gratuita, el respetu de los Drechos Humanos en tola so dimensión (drechos fundamentales y política social)...

¿Braeramente ye tan difícil ponese d'alcuerdo nesto?

Yo pidiría, casi rogaría, a les fuercies polítiques, asociaciones y coleutivos nacionaliegos y asturianistes que ficieren l'esfuerzu de sentase nuna mesa y aldericar. Aldericar sobro finxos xenerales y concretos y dexar pa prau pequeños matices d'un y otru llau qu'al final namái mos valen pa que siga gobernando'l PPSOE coles consecuencies qu’eso tien pa la nación d’Asturies.

Asturies merez tener una fuercia o un ensame de fuercies y coleutivos proasturianistes con representación parlamentaria. Dende’l mio puntu de vista ye l'únicu xeitu de qu'Asturies espoxigue, qu'haya xente nel Parlamentu Asturianu que braeramente trabaye por y p’aAsturies ensín redes clientelares, favores debíos a bancos, empreses y coses pel estilu.

Too esto sonarávos a la típica milonga, emperu ye que ye munchu más importante que too eso; ye qu’o esconsonamos comu pueblu ya entamamos a mirar per Asturies ya'l pueblu asturianu o tamos condergaos/es a desapaecer como tales. El pueblu asturianu, el pueblu astur, morrerá ya estinguiráse ensín remediu, y fadrálo porque nun supimos facer nada por nosotros/es mesmos/es como tal.

Ye daqué murnio, estúpido, irresponsable, incomprensible y nun sé cuántos axetivos más, emperu nun podemos pesllar los güeyos. Tamos viendo que ta pasando n'Asturies y tamos dexándolo pasar. Paez que nos ponemonos les anteoyeres pa nun ver na de lo que ta pasando tolos díes y nun queremos aceutar la realidá.

Si caltenemos esta rutina política n'Asturies, ¿qué vamos dici-yos al les xeneraciones futures? ¿Vamos poder vivir con ello?

Por favor, sentavos nuna mesa y aldericái dexando los prexuicios, los rencores ya intereses personale pa trescende-y a otru nivel, al de trabayar y lluchar por Asturies ya'l pueblu asturianu porque tamos xugándonos más qu'unes eleiciones. Tamos xugándonos la pervivencia del pueblu asturianu comu lu conocemos. Ta nes nueses manes.

Fernán Morán ye'l presidente de la Lliga Celta d'Asturies.

Contador Estadistiques