Skip to content

Noticies Europa Press

Muerre Luis ArgĂŒelles, fundador del MusĂ©u del Pueblu d’Asturies

Luis Argüelles, fundador del Pueblu d’Asturies y del Muséu de la Gaita, morrió’l sábadu en Xixón a los 84 años. Esti amante de la cultura asturiana foi tamién, col so trabayu, ún de los responsables del la recuperación del traxe del país.

Tres munchos esfuercios pa convencer a los responsables políticos de la época y algamar financiación, Argüelles fixo realidá’l so suañu de dar forma al Muséu del Pueblu d’Asturies nel añu 1968. Xunto con Avelino Moro principiaron a dar conteníu a una instalación que vivió un momentu d’esplendor na década de los 70. Un cambiu de xiru que se pretendía nel mesmu llevó a una destitución inxusta d’Argüelles nel so cargu de responsable del recintu, que quedaría abandonáu per una década hasta la so recuperación, yá nos 90.

Argüelles finó ayeri tres nun poder superar una neumonía que lu llevara al hospital. Detrás queden años y años de trabayu pa que nun quedara nel escaezu una cultura asturiana que diba camín de desapaecer. La llingua, la recuperación d’histories mitolóxiques y el traxe del país, el mundu rural…, son dalgunes de les estayes poles que puxó nesti tiempu. Un llabor que foi bien reconocíu pola sociedá civil, qu’entamó nestos años últimos los homenaxes que les instituciones nun fixeron. Asina, l’Asociación Cultural L’Arribada declarólu miembru honoríficu del coleutivu nun actu emotivu celebráu en xineru del 2012 y un grupu de ciudadanos instaló en setiembre nun llateral del edificiu qu’acueye’l Muséu de la Gaita una placa de recuerdu pa él y pal so compañeru Moro.

La capiella ardiente d’Argüelles ta instalada na sala 13 del Tanatoriu de Xixón. El funeral pola so alma va celebrase mañana, a les 17 hores, na ilesia parroquial de La Resurrección, na cai L’Infiestu.   

Na semeya, momentu nel que Carlos Rubiera entrega a Luis Argüelles en nome del Conceyu de Xixón una placa d’agradecimientu baxo la mirada atenta d’Alberto Álvarez Peña nun actu d'homenaxe de l'Asociación Cultural L'Arribada celebráu en xineru del 2012.

Chigre y stand turĂ­sticu, folixa y perres tiraes

La presencia d'Asturies nel Festival Intercélticu de Lorient nun ye namás per aciu de músicos escritores y artistes. Hai un par de carpes, chigre y el (decepcionante ) stand turísticu, que tamién manden un mensaxe de quién somos y cómo lo facemos.Poro, paga la pena comentar cómo son y con qué cuerpu queda ún depués de veles.

La cuestión hostelera ta presente nos espacios acutaos de tolos paises. Quien más quien menos tien una barra pa tomar dalgo mientres se visita la carpa o ves dalguna actuación. Asturies tien muncha tradición y presente gastronómicu, asina que ye lóxico  que nós tengamos un chigre llantáu en Lorient, p'amosar qué ye lo que comemos y lo que bebemos, especialmente la sidra. El chigre d'anguaño tenía una carta bona de comida y sidra a esgaya, anque a precios más de les llatitúes bretones que de les asturianes, 4,5 € la botella. Amás, había un escenariu onde de tarde y nueche actuaron dalgunos de los grupos que taben nel festival, asturianos o non. Toles nueches, bona parte de la delegación asturiana acaba nel chigre pa comentar el día, tomar un culín y echar unos bailles al son de la música del escenariu. Amás, les botelles de sidra pencima la cabeza son un bon reclamu pal visitante estranxeru, que primero mira interesáu y depués intenta'l retu sidreru d'echar, normalmente con poca fortuna. La carpa tuvo bien d'ambiente, convirtiéndose al final de les nueches nel sitiu onde diben a parar abondos festivaleros que buscaben la cabera barra abierta. Asina, xunta con un ambiente prestosu de xente tocando, baillando y tomando dalgo, había tamién un tonu xubíu que facía perder dalgo del calter atopadizu del sitiu. Echóse en falta l'anuncia previa del programa de conciertos de la carpa, asina como una decoración dalgo más cuidada del sitiu, ya que xunta'l llexítimu y necesariu interés mercantil del chigreru/a, ta la imaxe que se tresmite d'Asturies dende'l chigre.

Mención aparte merez la carpa que'l Principáu, en concreto la "Sociedad Regional de Turismo", punxo nel FIL al llau del chigre. D'esti espaciu hai poco que contar porque la carpa contaba bien poco, y ehí ta la cuestión (ver galería de semeyes). La información turística y del país que s'ufiertaba nella yera bien probe, la mayoría grandes paneles con semeyes de la campaña "Guardianes del Paraiso", que gustos aparte, nun son el conteníu que más puede llamar l'atención a los visitantes. El FIL ye un festival intercélticu, como'l so nome indica, colo que gran parte del visitante suel tar interesáu en ver y conocer les señes d'indentidá d'esi país (etnográfiques, llinguístiques, musicales...etc), especialmente aquelles que tengan que ver cola cultura céltica del arcu atlánticu.

Con too y con ello, el detalle qu'amuesa la indiferencia y desinterés por parte del Principáu pa col FIL ye que los testos de la carpa taben en castellanu, quitando unos pocos sobre l'asturcón escritos n'asturianu. Ye dicir, el Principáu considera que la llingua más falada y que se domina en Lorient, Bretaña y Francia ye'l castellanu, y nesa llingua quixo tresmitir Asturies. Anque los folletos que taben a disposición nun mostrador taben en francés, el primer reclamu  a la vista del visitante nos paneles taba nuna llingua que nun entiende, colo que namás que podemos esperar que la visita a la carpa del posible turista acabe bien rápido. Ye una pena tamién nesi espaciu nun hubiere una referencia al ferry Xixón Saint-Naizare, ya que ye de suponer que bien de los visitantes sedríen bretones, colo que pagaba'l tiru informalos de la presencia d'un mediu de tresporte directu a Asturies relativamente baratu y prácticu.

Un festival  que según la organización recibe a más de 700.000 visitantes y espectadores, nel que solo'l defile de la "Gran Parade" del pimer domingu axunta a 40.000 persones, y nel qu'Asturies ye la gran protagonista, tendría que recibir más y meyor atención por parte de les instituciones. Cuál ye'l problema lloxísticu o, tiendo a pensar, ideolóxicu, que fai que nun s'aproveche esta oportunidá, y que lo que se faiga ye tirar les perres en cumplir un espediente que, a les clares, nun se cumple y que se convierte na asignatura pendiente del FIL d'esti añu.

 

AcabĂł'l festival, naval y curdiones sirvieron de remate

Esti domingu 11 acabó la 43 edición del Festival Intercélticu de Lorient, los caberos díes la delegación asturiana tuvo representada polos habituales Xeitu y Llacín. más el curdionista Marcos García Alonso y l'espectáculu que xuntó los astilleros de Xixón y Saint-Nazaire.

Les bandes de gaites y los grupos de baille tienen trabayu abondo a lo llargo del festival, y más si yes el país homenaxeáu. Pueden actuar n'escenariu y cai, colo que tolos díes, d'una manera u otra, tiene que poner el traxe y facer dalguna actuación. Poro, les fuerces al final del FIL yá tán  dalgo escoses y yá van ganando les ganes de volver a casa sobre les de siguir festivaliando.

Pero'l vienres inda quedaben dos cites pa la delegación asturiana bastante importantes. Llástima que casi coincidieren a la mesma hora, y  mucha xente tuvo qu'echar a suertes a cual diba. Per un llau, l'asturianu Marcos García Alonso tuvo na Grande Soirée Accordeon, actuando en solitariu y primero del espactáculu "Samuraï", onde los curdioneros Bruno Le Tron, Riccardo Tesi, Markku Lepistö, Didier Laloy y David Munnely facíen un homenaxe al curdión diatónicu.

Media hora primero,  a les 21:00 hores, arrancaba el "Deux chantiers navals de l'Alantique: Saint Nazaire/Gijón" (pena de toponimia), proyectu pensáu pol curdineru bretón Alain Pennec que busca y alcuentra'l nexu ente los astilleros de les ciudaes asturiana y bretona, usando pa ello la música cola Orquesta de Jazz de Bretaña, la Bagad de Saint-Nzaire, y pela parte asturiana, la gaita de Iñaki Santianes y les percusiones y la voz de David Varela. L'espectáculu gustó, y la cuestión sedría agora ser quien a trayelu a Asturies, esperemos que la cocina yá tea nello.

 

An dro alredor del mundu y pasta, too puede pasar

Pocos díes queden de festival, l’actividá de la delegación asturiana va amernogando, pero con poco que se rasca inda se ven coses por ver y facer, ayeri batir records del mundu, baillar un ska o comer dalgo de pasta foron dalgunes de les ocupaciones.

La cosa va dando la vuelta, y en cuenta de tar saludando xente que ta acabantes de llegar a la ciudá, toca dir despidiendo a participantes que yá acabaron col llabor intercélticu y qu’adulces en coche o en ferry van tornando pa casa, quedando la xera, perimportante, de recordar y contar les anécdotes de viaxe, anque escúchase muncho per equí una adaptación del dichu del estáu de Nevada que diz, lo que pasa en Lorient queda en Lorient.

La cosa va dando la vuelta, pero queda tovía bastante por facer. Asina ayeri’l día foi intensu. Llacín y Xeitu volvíen a participar na quinta, y cabera, Nuit Interceltique, nueches espectaculares pero tamién cansaes ya incluso peligroses, porque la lluvia en Bretaña tien pase permanente, y baillar sobre un escenariu húmedu un pericote necesitaría de prebes d’adherencia dignes de la F1, y sinón que-y lo digan a la bailladora gallega que rompió una pierna nel espectáculu.

Skama la Rede teníen la responsabilidá de facer rock y ska astur nun festival domináu pol folk y la música tradicional. Ayeri tuvieron la oportunidá, cumpliendo dafechu nel escenariu Quai de la Bretagne, xunta una banda escocesa y otra córnica. Casi a la mesma hora que los del Cabu Peñes tocaben, taben nel escenariu de Espace Marine “Breizh Asturies Project”, grupu formáu por músicos bretones que cunta cola participación de Clara y Lorena, dos asturianes residentes en Bretaña que ponen la voz con temes asturianos que la banda encárgase a d’adaptar al son de la música bretona, y sobre too al de la Fest Noz, la fiesta más popular en Bretaña. Y ye qu’ayeri en Lorient celebrábase la inclusión de la Fest Noz como Patrimoniu Mundial pola UNESCO, y pa eso xuntaron a varios de los nomes más importantes de la música bretona. Erik Marchand, Hamon Martin Quintet, los hermanos Guichen, Startijenn…etc. Alredor de 5.000 persones baillando pa cellebrar el reconocimientu de la cultura tradicional y actual, y que quixo poner la guinda nel pastel faciendo el An Dro (danza) más grande del mundu baillando a varies ciudaes del mundu la vez a les 00:00 la nueche.

La nueche acabó con una cita yá tradicional nel FIL, la que se llama la fiesta de los italianos. Y ye que los de la bota ufiertan pasta, grappa y bon humor y muncha folixa pa estrechar amistá con asturianos y gallegos, pa una posible entrada futura del país alpín nel festival. 

 

Llan de Cubel siempre funciona

Muncha presencia asturiana a lo llargo de tol día d’ayeri, sobre too con grupos de baille y bandes de gaites, que remató cola actuación de Llan de Cubel nel escenariu más importante del Festival Intercélticu de Lorient, el Espace Marine.

La banda de gaites Llacín tuvo trabayu abondo ayeri. Per un llau desfile pela ciudá pela mañana pa dempués actuar na Nuit Interceltique, espectáculu que se desenvuelve nel estadiu de fúbol de la ciudá, y nel que representantes de cada nación actuen, principalmente bandes de gaites y grupos de baille, pa facer una amuesa de la cultura de los paises celtes. Too ello nun escenariu descomanáu con un equipu ambiciosu de lluz y soníu  y final de fueos artificiales como nes meyores romeríes. Mui parecío-y pasó al grupu de baille Xeitu, actuación pela tarde y participación na Nui Interceltique pela nueche.

El día acababa con Llan de Cubel y Capercaille nel Espace Marine, otru de los puntos cimeros de la presencia d’Asturies nel FIL. La carpa taba otra vuelta atacada de xente, y anque hai que suponer que muncho públicu taba polos perconocíos Capercaille, y que’l conciertu se llamaba “30 ans de Capercaille + invités”, Llan de Cubel entamó a tocar nuna carpa llena, y cerca de 5.000 persones rápidamente entendieron y conectaron con un conceptu de música y directu que los cubelos lleven faciendo muncho tiempu, y que tiene garantía de fábrica de funcionar. Da lo mesmo que tean dalgo desentrenaos, la calidá enriba del escenariu y la receptividá abaxo enllena d’aplausos y piticiones d’otra al públicu.

Hai que facer mención especial a los protagonistes de la nueche que yeren Capercaille, que cellebraben 30 años d’existencia. Ficiéronlo con un conciertu especialmente diseñáu pa la ocasión que buscaba ganar al públicu local dalgo qu’algamaron dafechu. Aparte de la formación habitual lliderada pola cantante Karen Matheson, y na que taba’l gaiteru Jarlath Herdenson sustituyendo a Michael Mcgoldrick, irlandés el primeru que grabó nel primer discu del grupu asturianu DRD, xubieron al escenariu convidaos bretones como Le Bagad de Lorient, la institución de la música bretona Dan Ar Braz arriendes de  Jamie McMenemy y Jean Michel Veillon del míticu grupu bretón Kornog.

Cuando’l festival va averándose al so final, estes nueches vuelven recordar la importancia de tar presente nun festival d’esti tipu, y lo importante ye que contar con una bona presencia musical, pero tamiién institucional, de lo que falaremos en próximos capítulos.

 

El Festival nuna cartografĂ­a sonora

Llorián García ye una persona de sobra conocida na música asturiana, musicólogu y gaiteru del grupu Dixebra, tamién ye un habitual del Festival Intercélticu de Lorient. Esi conocimientu del festival fae que s’atreva a ufiertanos una manera diferente d’averase al FIL, una cartografía sonora.

Les carpes, los escenarios, los chigres y los sitios onde hai ambiente ye dalgo que suel cambiar poco d’un añu pa otru nel Festival. El que tien esperiencia d’años sabe movese nel momentu adecuáu pa equí o p’allá, y puede tamién decatase de detalles que pal visitante novatu nun existen porque yá tien bastante con facese una idega d’ónde ta y cómo funciona aquello.

Del grupu de veteranos ye Llorián García, qu’esti añu decidió aportar la so visión particular faciendo una cartografía sonora del Festival Intercélticu de Lorient. Ello ye, grabar los soníos del festival qu’hai nun zona o nun momentu concreto, esi son en bruto que tenemos de fondu, que nun atendemos pa él, pero que se convertirá nuna especie de sabor sonoru que nos recordará al sitiu y l’eventu cuando escuchemos dalgo parecío n'otru sitiu dientro d’un tiempu. Pa sintir esta cartografía sonora calcái nesti enllace.

 

Éxitu de la nueche d’Asturies enriba y debaxo l’escenariu

Avanza’l festival y van socediéndose les actuaciones, ente les más importantes la d’ayeri, la “Grand Nuit des Asturies”, que cumplió coles espectatives del entregáu públicu asturianu, y del desixente espectador bretón.

A lo llargo d’estos díes el programa del FIL ta chiscáu d'actuaciones de la delegación asturiana. Asina, por exemplu, la banda de gaites Llacín y el grupu baille Xeitu participaron el domingu pasáu nel gran desfile de les naciones celtes qu’atraviesa Lorient a lo llargo de más de 2 hores. Un día antes, el sábadu, celebróse’l conciertu “Le voix de le Terre” xuntando nel escenariu el directu del discu “Aire” y los grupos Tuenda y Herbamora. Según los sos protagonistes, foi un retu difícil llevar alantre esi espectáculu, yá que los distintos músicos y cantantes teníen que cruzase y xuntase unos con otros, y llegó a ser demasiao abegoso. Con too y con ello, estes autocrítiques paez que seyan más productu de la autodesixencia que del resultáu final, que la xente que lu pudo ver dixo que foi perbonu.

Pero una de les grandes cites del festival llega cuando’l país al que se-y dedica’l festival ocupa n’esclusiva l’escenariu más grande ya importante del FIL, el “Espace Marine”. Ehí tán toles cartes enriba la mesa, y la selección de grupos de la dirección del FIL y la delegación asturiana tien que cumplir les espectatives, y eso pasó ayeri llunes. El Espace Marine ye una carpa descomanada onde entren más de 5.000 persones sentaes, un aforu más que respetable que conviértese nel primer desafiu de la nueche, yá que llenar esi espaciu tan grande coles entraes a 27 y 32 € nun ye cosa fácil. Pero esi primer retu superóse, y primero de qu’entamara Tuenda la carpa taba casi llena.

Tuenda entamó la nueche con un repertoriu cortu d’alredor de 45 minutos, la programación de la nueche obligaba a facelo asina. Ambás peleóse col so francés pa intentar facer entender al públicu d’ónde yera cada cantar, que por otra parte siempre recibe mui bien el son de Tuenda. Bretaña ye un llugar onde lo vocal y la danza son dos pegollos más que fundamentales de la so música tradicional, y ehí Tuenda  ufierta un conciertu qu’encaxa perbien col espitiru bretón. Ayudó tamién a ello les y los miembros de Xeitu, el grupu de baille presente en Lorient, qu'echó de manera espontanea unos bailles y dances enfrente l’escenariu pa completar l’espectáculu.

Hevia foi’l siguiente en xubise al escenariu, esta vegada acompañáu namás pola so hermana, Maria Jose, a les percusiones y una pianista. Un repertoriu tranquilu, onde Jose Ángel usó la xiblata, la gaita llectrónica y la tradicional y que tuvo’l so momentu cimeru cuando, solu, interpretó de manera técnicamente maxistral una versión de la pieza clásica “Asturias” d’Isaac Albéniz. Ehí’l públicu rompió a aplaudir y se llevantó de los sos asientos pa reconoce-y al gaiteru, dalgo emocionáu, la so interpretación.Pesllaba’l programa de la nueche la banda de gaites Llariegu col so espectáculu “100% Directo”. La banda lleva alredor de dos años faciéndo esti espectáculu que xunta la banda con refuerzos como metales, percusiones varies ya instrumentistes convidaos, faciendo un repertoriu con pieces tradicionales arreglaes, composiciones y hasta versiones de pop español y salsa. A Lorient notóse que l’espectáculu llegó bien maduru, dalgo qu’agradeció , por supuestu el públicu asturianu presente, pero tamién un espectador bretón al que yá se-y facía tarde pero qu’aguantó nel so sitiu énte la fuercia y variedá del espectáculu de Llariegu. Kepa Junquera y Héctor Braga fueron dalgunos de los músicos que xubieron al escenariu a ayudar a la banda gaites a rematar la Nueche d’Asturies.

Ayeri cuadró too, colo que salió redondo, y tol mundu quedó satisfechu y contentu de que la música asturiana consiguiera atrayer tantu públicu, y sobre too, a lo cabero de la nueche, convencelu de que ficieren bien en pasar dalgo más de trés hores sitiendo música fecha n’Asturies.

 

L’asturianu JesĂșs FernĂĄndez lleva’l Mc Crimmon

Ruémpese una pequeña tradición que dicía que l’añu d’Asturies nel FIL, el Mc Crimmon lu llevaba una gaita gallega. Jesús Fernández d’Uviéu, qu’entamó a tocar a los 7 años y  lleva años collechando otros premios como’l Noega y el Remís Ovalle, ganó’l troféu con más prestixu nel mundu de la gaita gallega y asturiana.

El restu de puestos queda de la siguiente manera, 2º el gallegu Xesús Rodríguez , 3º l’asturianu Álvaro Álavarez, 4º l’asturianu tamién Jorge Suárez, 5º de Galicia Jesús Sánchez, 6º gallegu tamién Lois Prado, 7º Ismael García de Galicia y 8º Jose Luís Fernández d'Asturies.

Más de tres hores de gaites con repertorios asturianu, gallegu y bretón ye’l Troféu de gaita Mc Crimmon. Nervios que lleven a dalgunos a cometer fallos que seguro va tiempu que nun faen, pero tamién dalgunes actuaciones que rescamplaron pola calidá na afinación y ornamentación, interpretando les típiques canciones de concursu nel repertoriu asturianu.

 

Echa andar el festival, tomando posiciones

Ayeri xueves pela tarde arrancaba’l Festival Intercélticu de Lorient, 9 díes per delantre de música, y non solo, nos qu’Asturies tien de consiguir ser la verdadera protagonista nel añu en que’l festival se dedica al nuestru país.

La mayoría de los representantes asturianos llegaron ayeri pela mañana nel ferry que comunica les ciudaes de Xixón y Saint Nazaire. El ferry podemos consideralu’l primer espaciu flotante del festival, ya que nél, al dir tantos músicos xuntos, la nueche faese corta y pa la delegación asturiana'l FIL entama un día primero y n’alta mar.

Al llegar vese bien la diferencia ente primerizos y veteranos. Los primeros dan una vuelta pa intentar facese una idega les dimensiones del festival. Los veteranos muévense como pexe nel agua, y van directos a los sitios qu’hai que dir conocedores d’onde tán y como funcionen. Acreditase y facese cola pegatina oficial del festival, esa allargada que lleven los gaiteros nes fundes de los sos instrumentos, son dalgunes de les ocupaciones el primer día.

Enantes de falar de música y demás, dicir que’l FIL va tener un recuerdu especial como homenaxe y xestu de solidariedá pa colos afectaos del accidente ferroviariu de Galicia. La dirección del festival tresmitió al traviés d’un comunicáu’l so dolor, y daba anuncia d’un minutu de silenciu nel Stade du Moustoir na Grande Parade, ún de los actos principales del FIL.

A les 7 la tarde d’ayeri echo andar el festival, anque la primer participación asturiana nun llegó hasta les 22:00 hores cuando’l raperu asturianu Dark la Eme xubió al escenariu xunta col bretón Dam? Fonk pa xuntar música bretona col funk y rap asturianu. La sidrería asturiana sirvió dempués como principal puntu de reunión pa la delegación asturiana. Muncha sidra y munches persones con instrumentos nes manos, arriendes de ganes de baillar, son garantía de folixa hasta que’l cuerpu y los horarios lo permitan. 

 

L'aliniaciĂłn pa Lorient

Per tierra, mar y aire (dalgún va dir n'avión) la delegación asturiana prepárase pa invadir Lorient a partir del vienres 2 d'agostu, día qu'echa andar el festival.Pa'llá va una esbilla de la música asturiana, que con los sos estilos particulares, busca encaxar nel so sitiu nun festival qu'espera alredor de 700.000 visitantes, nel qu'actúen 4.500 artistes en más de 120 espectáculos, too esto con un presupuestu de 5.242. 869 €, que según datos de la propia organización, 68% sal de l'autofinanciación. 

El Festival  Intercélticu de Lorient toma la ciudá con distintos escenarios y espacios nos que se desenvuelven  actuaciones de too tipu a hores bien diferentes. Poro, la delegación tiene que dir con una representación variada y adecuada pa poder cumplir en caún de los escenarios del festival. Asina, podemos alcontranos con que la salida va dala'l vienres 2 el raperu asturianu Dark la eMe (Mario Fueyo) pa siguir a partir d'esi momentu con un programa intensu a lo llargo de los 10 díes de festival.

Por más o menos estilos podemos organizar la delegación de la siguiente manera. Les bandes de gaites escoyíes angüaño fueron El Llacín de Llanes y Xeitu d'Uviéu. Desfiles pela ciudá y les "Nuits Interceltiques" son l'espaciu natural d'elles. Va haber otra banda de gaites, Llariegu, pero ésta va actuar na Gran Nueche d'Asturies col so espectáculu "100% Llariegu", a esi escenariu tamién va xubise una representación del folk asturianu col gaiteru Jose Ángel Hevia, esta vegada nun formatu de tríu con un pianu y percusiones, y Tuenda.

Les voces de les muyeres d'esti país van tener muncha importancia nesta delgación, ya que nel conciertu "Les voix de la terre/Las voces de la tierra" van tar el grupu vocal y de pandereteres Herbamora, el directu del discu "Aire", llideráu pol curdioneru Xuan Nel Expósito y el pianu de Jacobo de Miguel y que cunta coles voces de Anabel Santiago, Mapi Quintana y Marta Arbás. Nesi mesmu conciertu tamién va tar la voz d'un paisanu, Xosé Ambás que va repertir actuación con Tuenda. Pero si a Bretaña va una bona represenatcón de viz femenina, nun podía faltar Mariluz Cristobal Caunedo, que tamién va tar presente nel festival

Voz masculina, pero tamién manos de multinstrumentista, ye la de Héctor Braga que va facer un conciertu de música sacra. Ska, folk y rock tamién va pa la tierra de Merlín con Skama La Rede y el folk de corte más clásicu va colos míticos Llan de Cubel, que van compartir escenariu con Capercaille.

Arriendes de grupos, músicos de manera individual van caleyar les cais de Lorient participando de maneres mui distintes. El curdionista Marcos García Alonso y el gaiteru Iñaki Santianes van dar unes master clas de curdión y gaita respectivamente. Iñaki Santianes tamién va participar, xunta col tamién asturianu David Varela nel espectáculu  "Deux chantiers navals de l'Atlantique : Saint-Nazaire/Xixón" hermanamientu musical ente los astilleros de la ciudá xixonesa y la Bretona Saint-Nazaire.

P'acabar, la búsqeda de la gloria gaiteril nel "Trophée Mc Crimmon de gaita", qu'enfrenta a gaiteros gallegos, asturianos y bretones por facese con un premiu que van buscar los gaiteros asturianos  Jesús Fernández, Álvaro Álvarez, José Luis Fernández y Jorge Suárez.