Zapico va falar del republicanismu federal nuna charra en La Llegra

La conferencia lleva'l nome de 'Republicanismu federal: ¿l'asturianismu escaecíu?' y va celebrase esti xueves.

"El republicanismu federal ye una corriente política que constituyó la primer esquierda que tuvo Asturies y qu’algamó gran puxu popular nel terciu caberu del sieglu XIX, estendiéndose la so influencia hasta la Guerra Civil de 1936. El pensamientu y el pesu moral del so cabezaleru más nomáu, Francesc Pi i Margall, foron la principal carta de presentación d’esti partíu, el primeru en reconocer el derechu del pueblu asturianu al so autogobiernu. Esti aspectu conviértelu nun antecesor directu del asturianismu d’esquierda, datu esti mui escaecíu incluso ente los propios asturianistes", espliquen dende'l Llar La Llegra.

L'historiador Faustino Zapico va encargase d'esponer esti asuntu esta tarde, a les 19 hores, nel llocal uviedín asitiáu n'El Postigu Baxu númberu 40.