Zapico (IX) pide -n'asturianu- reorganizar les llínies de l'antigua Feve

|

Zapico alvierte de que los gobiernos de Madrid y d'Asturies tán dexando morrer  a la llingua asturiana y a los trenes de cercaníes

Ovidio Zapico, diputáu d'IX na Xunta Xeneral, realizó esta mañana una reconocencia a la llingua asturiana utilizándola pa empecipiar la so interpelación al Gobiernu sobre los trenes de cercaníes.

“Llingua y cercaníes aseméyense en munches coses”, aseguró'l diputáu d'IX  primero d'agorar que “les dos tan cerca de morrer y non precisamente porque esti grupu dexe de caltener viva la so llama”.

La llingua y les llínees ferroviaries de cercaníes, “les dos arrequexaes y en procesu de desaniciu por mor de quien gobernó en Madrid toos estos años y de quien equí-yos sigue'l pasu”, dixo Zapico refiriéndose tanto al Gobiernu del PP como al socialista asturianu.

Ovidio Zapico demandó a l'alministración asturiana una posición de exigencia ante'l Gobiernu central, competente nos trenes de cercaníes, que la so actitú calificó de “desidia”  pero tamién denunció la condescendencia del Gobiernu asturianu nesta materia.

A xuiciu del diputáu d'IX ye de “imperiosa necesidá” reorganizar les cercaníes, racionalizar les frecuencies, ufiertando una mayor frecuencia de trenes semidirectos, entendiendo'l ferrocarril como prestación social, como mediu de tresporte pa la zona rural; como vertebración del territoriu, como mediu sostenible ambientalmente y como recursu turísticu.

De la mesma, demandó la participación del Consorciu de Tresporte pa faelo más curiosu ameyorando, como consta nel alcuerdu de investidura d'IX cola FSA les condiciones de los bonos, aumentando les validaciones, desaniciando la caducidá, implementáu l'abonu nuevo, y faciendo tolo posible por llograr la unificación tarifaria ente RENFE y FEVE, ente les qu'esiste una bultable descoordinación, llegando inclusive a asolapase servicios.

Zapico recordó que'l deterioru de les cercaníes produzse añu a añu y el so númberu de viaxeros esbarrúmbase, más de 160.000 pasaxeros que perdió FEVE nel 2015.

 Nel diagnósticu de la situación y nes propuestes realizaes pol diputáu d'IX incluyó los trenes que circulen a 30 kilómetru per hora, un estáu de caltenimientu de los trenes deplorable  y la necesidá de renovación, l'acuciante necesidá d'actuar sobre la infraestructura;  el caltenimientu de les trincheres, el saneamientu de víes, la electrificación, la supresión de curves y pasos a nivel, el desdoblamientu obligáu en delles zones, que dexaría ganar velocidá, por casu, nel trazáu ente Xixón y La Pola Llaviana.
 
El diputáu d'IX, que pidió un alderique sele y ecuánime sobre la esmolecedora situación del ferrocarril, nun escaeció la necesidá urxente” de que los trenes d'altes prestaciones lleguen yá a Asturies, “y Asturies  ye La Pola L.lena”.

Denunció que'l tren lleva yá demasiaos años de trabayu sol Cordal nuna obra que va costar más que la Canal de Panamá y que nun ye'l momentu de proxectar trazaos faraónicos, sinón de la sostenibilidá y de realizar obres necesaries como la supresión de la curva de Villabona.
 
A xuiciu d'Ovidio Zapico ye tamién alarmante la situación del soterramientu de Llangréu, según la situación de la estación intermodal de Xixón o l'estáu d'abandonu del túnel de la Guía, onde “asistimos a una catastrófica y millonaria xestión de soterramientu”.
 
Pola so parte la conseyera d'Infraestructures, Belén Fernández, acusó al Gobiernu central de tar dexando morrer la rede de cercaníes y aseguró que al so Gobiernu nun-y va tremecer la voz pa esixir la meyora de cercaníes, un sistema abandonáu a la so suerte, y que de nun recibir inversiones va dir a peor nel futuru.

Fernández aseguró que Fomentu fai oyíos sordos a los sos pidimientos y que d'una inversión anunciada pa la rede de cercaníes nacional de 1.257 millones a Asturies destinaríen 9,9 millones d'euros.
 

Contador Estadistiques